"Sabah"ın yarımmüdafiəçisi Lepinitsa: Dambrauskasın yanaşması xoşuma gəlir

"Sabah"ın xorvatiyalı yarımmüdafiəçisi İvan Lepinitsanın futbolinfo.az saytına müsahibəsi

- Konfrans Liqasında "Petrokub"a hər iki oyunda qalib gəldiniz (2:0, 4:1). Rəqibi belə asanlıqla mübarizədən kənarlaşdıracağınızı gözləyirdiniz?

- "Petrokub"a qarşı hər iki oyuna çox yaxşı hazırlaşmışdıq. İlk matçda bir az qol imkanlarını dəyərləndirməkdə çətinlik çəkdik, amma sonda evdəki cavab oyunu üçün çox yaxşı nəticə əldə etdik. Bakıda isə işi tamamladıq.

- Cavab matçında 3 qol vuran Coy-Lens Mikelsin performansını necə şərh edərdiniz? Sanki Valdas Dambrauskasın gəlişi ən çox ona yarayıb…

- Möhtəşəm idi, nə deyə bilərəm ki?! Üç qol vurdu, üstəlik, bir assist etdi – bu, tam bir MVP (oyunun ən dəyərli futbolçusu) çıxışı idi.

- Konfrans Liqasında növbəti rəqib "Levski" olacaq. Şansları necə dəyərləndirirsiniz?

- Qarşıda bizi iki çətin oyun gözləyir, buna görə də yaxşı hazırlaşmalıyıq. Amma düşünürəm ki, növbəti mərhələyə keçmək üçün şanslarımız olacaq.

- "Sabah" "Çelye" ilə oyunlar da daxil olmaqla, bu mövsüm avrokuboklarda keçirdiyi bütün matçlarda hörmət ediləsi komandalardan olduğunu isbatlaya bilib. "Sabah"ın potensialı daha artığını etməyə, daha yaxşı oyun sərgiləməyə imkan verir?

- Əlbəttə, imkan verir. Düşünürəm ki, düzgün yoldayıq. Mövsümün ilk oyunları həmişə çətin keçir, komandaya inkişaf etmək və daha yaxşı olmaq üçün vaxt lazımdır. Hesab edirəm ki, hər növbəti görüşdə daha güclü və yaxşı çıxış edəcəyik.

- Valdas Dambrauskasın gəlişindən sonra məşqlərdə, komandanın oyun planında və ya futbolçulara münasibətdə ən çox ürəyinizcə olan dəyişiklik hansıdır?

- Baş məşqçi gözəl futbol oynamağımızı, topa nəzarət etməyimizi istəyir. Komandanın mümkün olan ən yaxşı səviyyəyə çatmasını arzulayır. Onun bu yanaşması xoşuma gəlir və düşünürəm ki, biz futbolçular Dambrauskasın təcrübəsindən gələcəkdə çox faydalana bilərik.

- "Sabah" kimi, digər klublarımızın da etdiyi transferlər, çempionata ciddi yanaşmaları yeni mövsümün daha rəqabətli keçəcəyini deməyə əsas verir. Bu fikirlə razısınız? Premyer Liqanın yeni sezonundan gözləntiniz nədir?

- Hər mövsüm çox rəqabətli keçir və düşünürəm ki, liqa hər il daha da böyüyəcək. Bəli, qarşıdakı mövsüm də çox rəqabətli olacaq. Biz isə öz oyunumuza və necə oynamaq istədiyimizə fokuslanmalıyıq. Hədəflərimiz həmişə yüksəkdir və həmişə olduğu kimi, bu mövsüm də əlimizdən gələni edəcəyik.

İdman.biz