Sport24.az
"Oyunun gedişatı ərzində "Sabah"ın ərazi üstünlüyü aydın hiss olunurdu". Bu sözləri Sport24.az-a açıqlamasında Arif Əsədov deyib.
Mütəxəssis "Sabah"ın Finlandiya təmsilçisi "KuPS"a qarşı keçirdiyi UEFA Çempionlar Liqasının II təsnifat mərhələsinin ilk oyunu haqqında fikirlərini bölüşüb:
"Topa nəzarətdə və yaradılan qol epizodlarının sayında da təmsilçimiz rəqibini üstələdi. Hesab edirəm ki, matçın cəmi bir qolla başa çatması oyunun mənzərəsini tam əks etdirmədi. "Sabah" birmənalı şəkildə bu cütün favoritidir. Bununla belə, "KuPS"u zəif rəqib hesab etmək düzgün olmaz. Onların da son dəqiqələrdə hesabı bərabərləşdirmək üçün real imkanları oldu.
Diqqət çəkən məqamlardan biri də rəqibin qapalı futbol oynamaması idi. Səfərdə belə açıq oyuna üstünlük verirlərsə, deməli, evdə də risk edəcəklər. "Sabah"ın yaratdığı təhlükəli epizodların əksəriyyəti isə əks-hücumlar zamanı baş verdi. Çünki rəqib hücuma çıxarkən müdafiədə müəyyən boşluqlar buraxırdı".
Qeyd edək ki, "Sabah" - "KuPS" matçı Azərbaycan təmsilçisinin 1:0 hesablı qələbəsi ilə başa çatıb. Tərəflər arasında cavab matçı iyulun 28-də Finlandiyada keçiriləcək. Cütün qalibi növbəti raundda "Orxus" (Danimarka) - "Lex" (Polşa) duelinin güclüsü ilə üz-üzə gələcək.
