Sport24.az
"Sabah"ın futbolçusu Stiv Solvetin Sport24.az-a müsahibəsi
- Misli Premyer Liqasının XVI turunda səfərdə "Sumqayıt"ı məğlub etdiniz. Oyun haqqında nə deyə bilərsən?
- Yaxşı oyun keçirdik. İli uğurla başa vurmaq vacib idi. Şadam ki, buna nail ola bildik.
- "Sabah" çempionatda mövsümün ilk yarısını birinci pillədə başa vurdu. Səncə, uğurlu çıxışın sirri nədir?
- Çox keyfiyyətli və güclü komandamız, yaxşı baş məşqçimiz var. Hamı birlikdə böyük zəhmətlə çalışır. Komandamızda kollektiv ruh yüksəkdir. Bu da meydanda özünü göstərir.
- Artıq demək olar ki, mövsümün yarısı geridə qalıb. Azərbaycanda "Qarabağ" neçə ildir ki, çempion olur. Səncə, onların bu seriyasına son verə biləcəksiniz?
- Hələ nəticə çıxarmaq üçün tezdir. Diqqətimizi öz üzərimizdə və gördüyümüz işdə saxlamalıyıq. İndi fasilə vaxtıdır, dincələcəyik və çempionat bərpa olunanda hazır şəkildə qayıdacağıq.
- Yayda "Sabah"a keçmisən. Hazırkı komandan və Azərbaycan Premyer Liqasının səviyyəsi haqqında fikirlərin maraqlıdır...
- Komandamızda gənc və təcrübəli futbolçuların yaxşı balansı var. Mövsümün əvvəlindən bu yana inkişaf etmişik. Bir yerdə oynamaqdan zövq alırıq. Ən vacib məqam da budur. Çempionat güclüdür, yaxşı komandalar var.
- Misli Premyer Liqasının ilk 16 matçının hər birində 90 dəqiqə oynamısan, üç qol da vurmusan. Bu stabil çıxışın haqqında nə deyə bilərsən. Səncə, artıq komandanın əvəzolunmaz üzvünə çevrilmisənmi?
- Burada özümü yaxşı hiss edirəm. Klub, baş məşqçi və məşqçi heyəti mənə güvənib və bu, mənim üçün çox önəmlidir. Bu etimadı doğrultmaq istəyirəm. Heç kim əvəzolunmaz deyil. Amma klubun yaxşı nəticə qazanması üçün komandada olan hər kəs vacibdir.
