“Sabah”ın kapitanı: “Buna həyəcan təbili də deyərdim”

Konfrans Liqasının III təsnifat mərhələsinin ilk oyununda "Sent Patriks"ə məğlub olan "Sabah", Premyer Liqanın II turunda "Zirə" yenildi. Mövsümlərarası fasilədə heyətini yetərincə gücləndirən "bayquşlar"ın belə zəif çıxışı çoxlarını təəccübləndirir. Masazır təmsilçisinin düşərgəsində nə baş verir? Bu suala cavab tapmaq üçün "Sabah"ın kapitanı Elvin Camalovla söhbətləşməyi lazım bildik. Camalov Sport24.az-a müsahibəsində bizi maraqlandıran bəzi məqamlara aydınlıq gətirməyə çalışıb.

- İki avrokubok oyununu da nəzərə alsaq, son 4 oyundan 3-də meydanı məğlub tərk etmisiz. Uğursuz çıxşın səbəbini bilmək istərdik...
- Bizim işə yanaşmamız olduğu kimi qalır. Maksimum az səhvlə yaxşı nəticələr qazanmaq istəyirik. Amma nədənsə bir qədər toparlanmaqda çətinlik çəkirik.

- 4 oyunda qapınızda 11 qol görmüsüz. Müdafiənin belə zəif çıxışı nə ilə bağlıdı?
- Heç şübhəsiz ki, bu ciddi problemdi və hamımızı narahat edir. Buna həyəcan təbili də deyərdim. Maksimum çalışırıq ki, səhvləri aradan qaldıraq. "Sent Patriks" ilə cavab oyununa kimi nöqsanlarımız üzərində çalışıb hazır vəziyyətə gələcəyimizə inanıram.

- "Makkabi" ilə cavab qarşılaşmasından sonra komanda sanki psixoloji sarsıntı yaşayır...
- Təbii ki, son oyunlardakı nəticələrimiz ürəkaçan deyil. Gözlənilmədən çox qol buraxmaqla məğlub oluruq. Qapımıza qol vurulursa, hamı günahkardı. Nəticələrimiz istədiyimiz kimi olmasa da, mənəvi-psixoloji tənəzzül yaşadığımızı deməzdim.

- Belə oyunla İrlandiya klubunu keçə biləcəyinizə inanırsan?
- Ümid ən sonda ölür. Qələbəyə çox ehtiyacımız var. Düşünürəm ki, bir uğurlu oyunla "relsə" düşəcəyik. Cavab qarşılaşamsında ilk dəqiqədən son saniyəyədək mübarizə aparacağıq. Məqsədimiz "Sent Patriks" səddini keçməkdi.

ABDULLA İSMAYILOĞLU