Report.az
Bu oyunda üç xal qazanmaq çox vacib idi.
Bunu "Report"a açıqlamasında "Sabah"ın kapitanı Elvin Camalov deyib.
29 yaşlı futbolçu Misli Premyer Liqasının XVII turunda "Araz-Naxçıvan"ı məğlub etdikləri matç (1:0) barədə danışıb.
Camalov qarşılaşmanın gərgin və maraqlı keçdiyini bildirib:
"Hər iki kollektiv çox ehtiyatlı davranırdı. Çünki vacib qarşılaşma idi. Bu görüşdən üç xalla ayrılmaq istəyirdik. Sonda bunu bacardıq. Standart vəziyyətdən yararlandıq və qapımızı toxunulmaz saxlaya bildik. Bu üç xal daha da irəliyə getmək üçün çox vacib idi".
Yarımmüdafiəçi cari mövsümdəki hədəflərdən söz açıb:
"Hələ çempionatın ikinci yarısı olacaq. İlin sonunda bir oyunumuz var. "Şamaxı"ya qarşı qarşılaşmadan da üç xalla ayrılmaq üçün çalışacağıq. Fasiləyə yaxşı əhval-ruhiyyədə yollanmaq niyyətindəyik. Mövsümün ikinci mərhələsinə daha yaxşı start vermək istəyirik. Ancaq irəliyə baxmalı, növbəti matça köklənməliyik. Deyə bilərəm ki, sonadək mübarizə aparacağıq".
Qeyd edək ki, "Sabah" 17 turdan sonra 26 xalla beşinci pillədə qərarlaşıb. Paytaxt klubu XVIII turda, dekabrın 22-də "Şamaxı"nın qonağı olacaq.
