Idman.biz
"Sabah"ın yarımmüdafiəçisi Abdulla Xaybullayev Sportal.az-a müsahibəsi
- "Neftçi" ilə kubok görüşündə 1:1 bərabərə qalaraq, finala vəsiqə qazandınız. Görüşün bu qədər gərgin keçəcəyini gözləyirdiz?
- Əlbəttə, oyunun bu qədər çətin keçəcəyini gözləyirdik. Ehtimal edirdik ki, "Neftçi" ilk dəqiqələrdən hücuma atılacaq. Düzü, çətin keçdi. Birinci hissədə üstünlük "Neftçi"nin tərəfində idi. Bir neçə qol epizodu yarada bildilər. Lakin fasilədən sonra bizim çoxlu qol epizodumuz oldu, onlardan yararlana bilmədik. Bu sezon qol epizodları yaradırıq, ancaq onları vurmaq alınmır. Hər halda, "Neftçi" ilə görüşdə istənilən nəticəni qazandıq və indi finaldayıq.
- Birinci matçın hər iki hissəsində dominant futbol oynadınız, amma cavab görüşündə bunu ilk hissədə etmək alınmadı. Baş məşqçinin tapşırığı belə idi ki, əks-hücumda oynamalısız?
- Xeyr, belə tapşırıq yox idi. Deməzdim ki, biz pis oynadıq. Sadəcə "Neftçi"də hücumda yaxşı alınırdı. Amma buna baxmayaraq, birinci hissəni pis keçirdiyimizi də deməzdim, normal oynadıq.
- Filip Ozobiçin ardıcıl üç qol epizodu var idi. Onlar qolla nəticələnsəydi, necə olacaqdı?
- Təbii ki, o epizodlar qolla nəticələnsəydi, bizim üçün güclü zərbə olardı. Yaxşı ki, qol olmadı. Stas Pokatilova da təşəkkür edirəm ki, həmin epizodlarda bizi xilas etdi. Əslində, fasilədən sonra bizim qol epizodlarımız çox idi. Amma yararlana bilməməyimiz...Səbəbini bilmirəm. Bayaq dediyim kimi, mövsüm ərzində çoxlu qol epizodları yaradırıq, ancaq alınmır.
- Finalda "Qarabağ"la qarşılaşacaqsınız. Oyuna bir ay vaxt var. Amma yəqin ki, indidən final ab-havası, istək var?
- İlk dəfədir ki, finalda oynayacağıq. Oyuna böyük istəklə çıxacağıq. Bu bizim kubokdur və onu qazanmalıyıq.
- Kuboku qazana bilməsəz, avrokuboklara vəsiqə qazanmaq reallaşmayacaq. Bu məqam sizin üçün ikiqat motivasiyadır, yoxsa təzyiq?
- Əlbəttə ki, bu məqam bizim üçün ikiqat motivasiya olacaq. Çempionatda işlərimiz yaxşı getmir. Avrokuboklara yollanmağı çox istəyirik. Bir yolumuz var, kuboku qazanaraq Avropaya yollanaq.
- Vasili Berezutskinin gəlişindən sonra start heyətində daha çox oynayırsan. Yeni mövsümdən Premyer Liqada legioner limiti tətbiq olunmayacaq. Səni narahat edən məsələdir?
- Xeyr, legioner limitinin tətbiq olunmaması məni narahat etmir. Çünki güclü rəqabət hər zaman yaxşıdır. Rəqabətdən də qorxmuram. Mən güclü olacamsa, oynayacam. Əksi olarsa, həmin futbolçu oynayacaq.
- Vaxtı ilə "Sabah"dan ayrılmadın, Gürcüstana yollanaraq "Samtrediya"da icarə əsasında oynadın. Orada qollar və asistlərin də oldu. Gürcüstanda legioner həyatı yaşamağın hazırda "Sabah"da start heyətində yer almağına kömək oldu?
- Əlbəttə. Gürcüstanda oynamağım mənə böyük təcrübə qazandırdı. Çoxlu oyunlar oynadım, qollar vurdum, asistlər etdim. Düzdür, çox deyildi. Amma istənilən halda, Gürcüstandakı legioner həyatım mənə təcrübə verdi.
- "Sabah"la müqavilən başa çatır?
- Xeyr, hələ bir illik müqaviləm qüvvədədir. "Sabah" üçün ən yaxşısını etməyə çalışacam.
İdman.biz
