"Sabah"ın baş məşqçisi hakim qərarı ilə razılaşmadı: "O qərar tam yanlış idi"

"Karvan-Yevlax" -"Sabah" matçından sonra baş məşqçilərin iştirakı ilə mətbuat konfransı keçirilib.

İdman.biz xəbər verir ki, öncə media nümayəndələri qarşısına qonaqların baş məşqçisi Valdas Dambrauskas sualları cavablandırıb.

Mütəxəssis bildirib ki, birinci saniyədən sona qədər dominant oynayıblar: "Üç-dörd qol vura bilərdik. Mən də bunu istərdim. Üç xal qazandıq. Müsbət haldı. Mikelsin zədələnməsi hamımızı üzdü. Allaha dua edəcəyik ki, heç nə olmasın".

- Adətən, nəticə həll olandan sonra baş məşqçilər aparıcı futbolçuları meydandan çıxarır. Amma Mikels sona qədər oynadı. Nəyə görə?

- Bilmirəm niyə belə deyirsiz. Yeganə mərkəz hücumçumuz odu. O çox istəklidi. Buna görə də meydanda saxlamaq istədim.

- "Sumqayıt"la oyundan sonra hakimlikdən şikayət etmişdiz, amma De Blekere bütün qərarların doğru olduğunu dedi.

- O De Blekerenin fikridi. Buna hörmətlə yanaşıram. Amma mən şəxsən fərqli ölkələrdə top səviyyədə olan hakimlərlə işləmişəm. O qərar tam yanlış idi. Mənə maraqlıdı ki, yenə elə epizod olsa, eyni qərar veriləcək? Bütün futbolda qızıl qayda var ki, 50/50 qərarlarda davam olsun. Bu, qaranlıq otaqda pişik axtarmaq kimidi.

- İki qol vurduz, ikisi də kuryoz alındı. Bəli, üç-dörd qol vura bilərdiz. "Az qan"la oynamaq sizin qərarınız idi?

- Sizinlə razı deyiləm. Bu cür komandalar 11 nəfərlə müdafiə olunur. Rəqib 44, 46-cı dəqiqələrdə cərimə meydançamıza daxil oldu. Sıx şəkildə oynayan komandalara qarşı oynamaq çətindi. "Az qan"la oynamaq fikri ilə razı deyiləm. Son ötürmələrdə keyfiyyət çatışmazlığı olur.

- Mikelsin durumu ciddi olsa, bu sizin üçün problem yaradacaq?

- Bu bizdə ilk zədə deyil. Sekidika, Şafranko, Noqeyra, Zinəddin, Aleksey - hamısı çox vacib futbolçudu. Amma zədəyə görə məndən şikayət eşidə bilməzsiz. Sizə milyon faiz təminat verirəm ki, qalib gəlsək də, uduzsaq da, 11 nəfərlə meydana çıxacağıq.

İdman.biz