İdman.biz
"Sabah" Hayfa "Makkabi"sini Konfrans Liqasında böyük hesabla məğlub edən və bu İsrail klubunu nominal olsa belə onun meydançasında üstələyən ikinci komandadır.
İdman.biz rəqibin Konfrans Liqasındakı çıxışları tarixini izləyib.
"Sabah" qeyd edilən hər iki halda Berlin "Union"unu təkrarlayıb. Bu turnirdə üçüncü mövsümünü keçirən "Makkabi" 2021-2022-ci illər mövsümündə qrupda berlinlilərə səfərdə 0:3 hesabı ilə yenilib, "Sabah"a qədər Konfrans Liqasında yeganə ev məğlubiyyətini də həmin qrupda "Union"dan alıb – 0:1.
Paytaxt klubumuz "Makkabi"ni məğlub etməklə İsrail klubunu Konfrans Liqasında mənfi balansa salıb. Hayfalılar artıq 17 matçda 6 qələbə qarşısında 7 məğlubiyyət alıblar.
"Makkabi" ümumiyyətlə avrokuboklarda mənfi balansdan "Sabah"la iki matçda çıxmaq arzusunda olsa da, bu istəyini də təxirə salası olub. İndi komandanın qitə yarışlarında 165 oyunda 65 qələbə müqabilində 68 məğlubiyyəti var.
Avrokuboklarda 250-ci yubiley qolunu da Hayfa təmsilçisi ən azından Bakıdakı oyuna təxirə salmalı olub. Hazırda klubun hesabında 249 qol var.
Qeyd edək ki, "Sabah" "Makkabi"ni səfər matçında 3:0 hesabı ilə məğlub edib.
Vüqar Məmmədov
İdman.biz
