Idman.biz
"Kubokdakı qol özümə olan inamımı bərpa etməyə kömək etdi. Mən işləməyə davam etmək və nəticə göstərmək istəyirəm".
Bunu Misli Premyer Liqasında 15 turdan sonra 9 xalla 10-cu pillədə qərarlaşan "Kəpəz" klubunun yaponiyalı futbolçusu Ryonosuke Ohori AZƏRTAC-a müsahibəsində deyib.
Həmin müsahibəni təqdim edirik.
– Komandanızın Misli Premyer Liqasının 15- ci turunda "Qəbələ" üzərində qazandığı vacib qələbəni (1:0) necə şərh edərdiniz?
– Bu, çox önəmli qarşılaşma idi. Bilirdik ki, mütləq qələbə qazanmalıyıq. Bunu bacardığımıza görə şadam.
– Qarşılaşmada yeganə qolun müəllifi məhz siz oldunuz. Üstəlik, qol kifayət qədər baxımlı alındı. Bir neçə müdafiəçini keçib dəqiq zərbə ilə fərqləndiniz. Açığı, bir anlıq elə təəssürat yarandı ki, qolu vuran siz yox, Lionel Messidir...
– Son oyunlarda tez-tez driblinqlə müdafiəçiləri keçməyə çalışıram. Sevinirəm ki, "Qəbələ" ilə matçda bu cəhdim yaxşı nəticəyə gətirib çıxardı.
– Son matçlarda özünüzü yaxşı tərəfdən göstərə bilirsiniz. Öncə ölkə kubokunda, sonra isə çempionatda komandanız üçün vacib qollara imza atdınız. Şəxsi performansınızı necə qiymətləndirirsiniz?
– Kubokdakı qol özümə olan inamımı bərpa etməyə kömək etdi. Mən işləməyə davam etmək və nəticə göstərmək istəyirəm.
– Müqavilə ilə "Neftçi"yə məxsussunuz və "Kəpəz"də icarə əsasında çıxış edirsiniz. Bakı klubundakı uğursuz çıxışdan sonra "Kəpəz"də özünüzdən belə oyun gözləyirdiniz? Ümumiyyətlə, "Neftçi"də işləriniz niyə istədiyiniz kimi alınmadı?
– "Neftçi"də olarkən ayağımdan zədə almışdım və bu, mənə uzun müddət problem yaratdı. Bu səbəbdən istədiyim səviyyədə çıxış edə bilmədim.
– Bildiyiniz kimi, Yuri Vernidub "Neftçi"nin yeni baş məşqçisi təyin olunub. Ukraynalı mütəxəssis qış fasiləsində sizi yenidən komandada görmək istəsə, cavabınız nə olar?
– Hazırda buna fikir vermirəm. İndi diqqətimi yalnız meydanda maksimumumu göstərməyə yönəltmişəm.
– "Kəpəz" yavaş-yavaş turnir cədvəlində təhlükəli zonadan uzaqlaşır. Necə düşünürsünüz, bu mövsüm Premyer Liqada qalmaq mümkün olacaq?
– Əminəm ki, qalacağıq. Bunun üçün isə turnir cədvəlində daha yuxarı pillələrə qalxmalıyıq.
