Rüstəm Məmmədov: “Kasad heyətlə böyük hədəflər uğrunda mübarizə aparmaq qeyri-mümkündü”

"Ötən mövsümlü müqayisədə bu il vəziyyətimiz bir qədər yaxşıdı. Ən azı Zaqatala İdman Kompleksindən rahat istifadə edə biləcəyik. Buna baxmayaraq, bir çox problemlərimiz hələ də qalmaqdadı". Bu sözləri Sport24.az-a açıqlamasında "Zaqatala"nın baş məşqçisi Rüstəm Məmmədov deyib.

Bölgə təmsilçisinin çalışdırıcısı transfer məsələlərini toxunmaqla yanaşı, yoxlama oyunları keçirmək üçün rəqib tapmadıqlarına da vurğulayıb: "Büdcəmiz kasad olduğuna görə istədiyimiz oyunçuları transfer edə bilmirik. Futbolçulara istədikləti məvacibi verə bilmirik. Əvvəllər dediyim kimi bazarda keyfiyyətli yerli oyunçu tapmaq çox çətindi. Belə olduqda legioner axtarışına çıxırıq. Ehtiyar qüvvəmiz yox dərəcəsindədi. Halbuki, hər mövqeyə ən azı iki oyunçum olmalıdı. Kasad heyətlə böyük hədəflər uğrunda mübarizə aparmaq qeyri-mümkündü. Mövcud büdcəmizi nəzərə alaraq ən azı iki keyfiyyətli transferə ehtiyac var. Bunu həyata keçirə bilsək mövsümə 70-80 % hazır olacağıq. Bu vaxta kimi üç yoxlama matçı keçirmişik və hamısında məğlub olmuşuq. Sınaq oyunları üçün rəqib tapmaqda da çətinlik çəkirik. Zəif büdcəyə görə bölgələrə gedə bilmirik. Digər klublarda uzaqlığa görə Zaqatalaya gəlmir. Çalışacağıq çempionatın startına kimi komandanı müəyyən qədər hazır edək".

Qeyd edək ki, I Liqada yeni mövsümə Sentyabrın 11-də start veriləcək.

ABDULLA İSMAYILOĞLU