Sport24.az
"Zirə"nin "Kəpəz"i məğlub etdiyi (3:0) oyunda vurulan qollardan birinin müəllifi Rüstəm Əhmədzadə olub. "Qaratallar"ın hücumçusu Gəncə təmsilçisi ilə matçdan sonra Sport24.az-a müsahibə verib.
- Öncə "Kəpəz"lə oyun barədə fikirlərini bölüşərdin...
- Yaxşı oyun sərgilədik, qol imkanlarımız çox olsa da, onlardan yalnız 3-nü dəyərləndirdik. Fikrimcə, hesab daha böyük olmalı idi. İstənilən halda qələbə qazandığımıza sevinirəm.
- Komandanın ikinci qoluna imza atmaqla mövsümdəki qol hesabını açdın...
- Qol vurmağıma sevinirəm. Amma bu hələ hər şey demək deyil. Hələ üzərimdə işləməli, daha çox qollar vurmalıyam. Fərqləndiyim oyunda komandam qalib gələcəksə, bu mənim üçün ikiqat xoşbəxtlik olacaq.
- Start sürətin artıb, indi cinahlarda daha çox reyd edirsən...
- (gülür) Hər halda sürət birdən-birə artmır. Görünür komanda olaraq intensiv çalışırıq, üzərimizdə çox işləyirik və bu da nəticəsini göstərir.
- Müqaviləylə məxsus olduğun "Qarabağ" səfərdə "Totterhem"ə məğlub oldu. Matçla bağlı fikirlərin maraqlıdır?
- Oyunu səbrsizliklə gözləyirdim və böyük həyacanla baxdım. Səmimi deyim ki, "Qarabağ" çoxlarının gözləmədiyi halda İngiltərədə inamlı oyun sərgilədi. Qurban Qurbanovun komandası cəsarətli futbolu ilə yadda qaldı. Sadəcə, əlinə düşən qol imkanlarını boşa verdilər. Əgər fürsətlərdən yararlansaydılar nəticə fərqli olacaqdı. Düşünürəm ki, "Qarabağ"ın bir az da bəxti gətirmədi. Ağdamlıları Avropa Liqasında Liqa mərhələsində daha bir neçə oyun gözləyir. İnanıram ki, "Qarabağ" cari avrokubok mövsümündə də adından söz etdirməyi bacaracaq.
ABDULLA İSMAYILOĞLU
