Sport24.az
Oyunların manipulyasiyası səbəbindən "Şamaxı" ötən ilin dekabrında iki futbolçusu - Adil Nağıyev və Georgi Kantariya ilə müqaviləyə xitam verdi.
Ötən ayın sonlarında, daha dəqiq desək, İntizam Komitəsinin yanvarın 30-da keçirilən iclasında Nağıyevin futboldan ömürlük uzaqlaşdırlması ilə bağlı qərar qəbul olundu. Onunla bigə adı neqativ olayda hallanan gürcü futbolçunun isə bir neçə gün öncə Rusiya I Liqasında mübarizə aparan "Sokol"la mövsümün sonunadək yeni müqavilə bağladığı barədə xəbərlər yayıldı.
Bu yerdə ortaya sual çıxır. Adil cəzalandığı halda, necə olur ki, gürcü futbolçu Saratov klubu ilə yeni anlaşmaya imza atır? Bu məsələdə iki versiya var. Ya Kantariyanın heç bir günahı yoxdu, ya da Rusiya klubunun rəsmiləri Kantariyanın Azərbaycandan hansı səbəbə qovulduğu haqda məlumatsızdılar...
Ancaq bizə çatan bilgiyə əsasən, ruslar gürcünün nəyə görə "Şamaxı"dan qovulduğunu bilir. Hətta onunla bağlı "şirlər"in rəsmiləri ilə əlaqə saxlayıb və baş verənlər barədə ətraflı məlumat toplayıblar. Ancaq buna baxmayaraq, Kantariya ilə münasibəti rəmsiləşdiriblər.
Onda belə çıxır ki, saratovlulara məhz Kantariya kimi oyunların nəticələrinə birbaşa təsir edən futbolçu lazım imiş...
Məsələ ilə bağlı "Şamaxı"nın baş meneceri Kamran İsmayılovla danışdıq. Kamran bəy Sport24.az-a açıqlamasında Rusiya klubundan zəng gəldiyini təsdiq etdi:
"Georgi Kantariya "Sokol"la müqavilə bağlamamışdan öncə Rusiya klubundan bizə zəng gəlmişdi. Onun barəsində məlumat toplamaq istəyirdilər. Mən də baş verənlər haqda onlara informasiya verdim. Bildirdim ki, iki futbolçu barədə şübhələr var idi. AFFA rəhbərliyi aiddiyatı qurumlarla birgə araşdırma apardı və şübhələndiyimiz oyunçulardan biri futboldan ömürlük uzaqlaşdırıldı. Ancaq Kantariya barədə hələ ki, heç bir qərar yoxdu. Onun sənədləri AFFA-dadı. Bu söhbətdən sonra Rusiya təmsilçisi gürcünün transferini reallaşdırdı".
