Sport24.az
"Premyer Liqadan təkliflərim vardı. Amma ümumi məxrəcə gələ bilmədik. Halbuki, elitanın 3-4 komandasında oynaya biləcək gücdəyəm. Ötən mövsüm I Liqada çempionluğu iddialı "İmişli"də oynadım. Amma şərait və infrastruktur yaxşı deyil. Belə olduqda II liqada mübarizə aparacaq "Şahdağ Qusar"la anlaşdım. Bu sözləri Sport24.az-a açıqlamasında Ruslan Hacıyev deyib.
26 yaşlı yarımmüdafiəçi Qusar klubuna üz tutmasında Rahid Əmirquliyev amilinin olması ilə yanaşı, klubun qarşısına qoyulan məqsədin əsas rol oynadığını da vurğulayıb: "Rahid Əmirquliyevlə "Səbail"də birgə oynamışıq. O, təcrübəli futbolçu olmaqla yanaşı, həm də gözəl insan, yaxşı dostdur. "Şahdağ Qusar"dan təklif gələndə Rahid Əmirquıiyev faktoru böyük rol oynadı. Onunla yenidən bir komandada çiyin-çiyinə mübarizə aparacağıma sevinirəm. Qusar təmsilçisində hazırda yeni baş məşqçi Elnur Abdullayev gəlib. Komanda II Liqanın çempionu olmağı qarşısına məqsəd qoyub. Mən də öz növbəmdə yeni klubumla yeni səhifə açmaq istəyirəm. Bunun üçün əlimrən gələnin ən yaxşısını etməyə çalışacam".
Qeyd edək ki, Hacıyev karyerası ərzində "Qarabağ" və "Səbail" kimi elita klublarında çıxış edib.
ABDULLA İSMAYILOĞLU
