Rusiya mətbuatında “Zirə”yə İNAM

Bu gün Nikosiyada Konfrans Liqasının pley-off mərhələsində "Zirə" yerli "Omoniya" ilə qarşılaşacaq.

İdman.biz Rusiyanın soccer365.ru saytının Bakı təmsilçisinin kiprlilərlə ilk oyununda qüvvələr nisbətinə həsr olunmuş yazısını təqdim edir.

Məqalə müəllifinin fikrincə, "Omoniya" kifayət qədər oyun praktikasına malik olmaya bilər: "Kipr klubu bu mövsüm cəmi dörd oyun keçirib – hamısı Konfrans Liqasının təsnifatında. Bəli, "Omoniya" dördündə də qələbə qazanıb, amma nüanslar var. Birincisi, ciddi müqavimətlə qarşılaşmayıb - "Torpedo Kutaisi" və "Fehervar" ən ciddi rəqiblər deyil. İkincisi, optimal şəraitə çatmaq üçün dörd matç kifayət deyil - Kipr klubu yenicə sürətlənir. Həmçinin mövsümöncəsi suallar doğurur: dörd yoldaşlıq görüşündə sıfır qələbə, üç məğlubiyyət və yalnız bir heç-heçə var".

Ötən mövsüm 14 qol vuran və oktyabra qədər sıradan çıxan "Omoniya"nın bombardiri Roman Bezusun zədəsi xatırladılır və bütün ümidlər Villi Semedoya bəslənilir: "Kabo-verdeli də ötən mövsüm 14 qol vurub və o, cari mövsümə yaxşı start verib - dörd görüşdə iki qol. O, həm Kutaisi "Torpedo"su, həm də "Fehervar"a qol vurub. Bununla belə, Valdas Dambrauskasın seçimi azdır: komandada hücumçu mövqeyi gücləndirilməyib. "Omoniya" bir sıra azad agentlərlə müqavilə imzalasa da, bunu hücum xəttində etməyib.

Hücumdakı böhrandan bəhs edilir: "Ferehvar" ilə iki oyunluq qarşıdurmada "Omoniya" rəqibin qapısına cəmi 29 zərbə endirib, lakin cəmi 3 qol vurub – qol fürsətlərindən istifadədə problemlər var".

Məqalədə qeyd olunur ki, "Zirə" üstün rəqibə meydan oxumağa hazırdır və mövsümə çoxdan başlayıb: "Artıq 9 oyun keçirib, onlardan altısında qalib gəlib, yalnız birində "Şerif"ə uduzub".

"Zirə"nin itkilərinin cüzi olduğu və diqqətin Rafael Utziqə yönələcəyi bildirilir: "Məhz bu oğlana həm azarkeşlər, həm də rəqiblər xüsusi diqqət yetirməlidirlər: braziliyalı son beş matçın dördündə qol vurub".

Komandamızın səfərdə yaxşı çıxışı qeyd olunur: "Zirə"nin avrokubokda təcrübəsi çox olmasa da, bu mövsüm səfərdə - həm avrokuboklarda, həm də daxili yarışlarda yaxşı çıxış edir. Mövsümün dörd səfər oyununda üç qələbə və bir heç-heçə əldə edən komanda hətta "Şerif" kimi ciddi rəqibini də məğlub etməyi bacarıb (1:0). Müdafiədə oturan "Zirə" 89-cu dəqiqədə əks-hücuma keçərək matçın yeganə qoluna imza atıb. Çox güman ki, azərbaycanlıların "Omoniya" ilə oyun üçün planı məhz belədir - bu, bəlkə də onların uğur qazanmaq üçün yeganə şansıdır".

Məqalə müəllifi "Zirə"ni bu cütdə autsayder saysa da, Bakı klubunun sürpriz edə biləcəyini istisna etmir.

Oyun üçün saytın proqnozu - 1:1

İdman.biz