Rusiya klubunda çıxış edən futbolçu: "Azərbaycan milli komandasının heyətində oynamağı arzulayıram" - MÜSAHİBƏ

Rusiyanın "SKA-Xabarovsk" klubunun futbolçusu Sadiq Baqiyev Azərbaycanın U-21 yığmasına dəvət ediləcək.

İdman.biz xəbər verir ki, Sportal.az saytına müsahibə verən həmyerlimiz əsas millimizdə oynamaq istəyindən də söhbət açıb.

- Mövsümün sonuna 2 tur qalıb. Komanda Premyer Liqa şanslarını itirdi. Mövsüm sizin üçün necə keçdi? Yəqin ki, əsas hədəf Premyer Liqaya vəsiqə qazanmaq idi?

- Məncə, hələ də şansımız var. Amma təbii ki, 5-ci pillə pley-off oyunları oynayacaqsa, belədir. Düzünü deyim də, mövsümün əvvəlində heç kim Premyer Liqaya çıxmaq uğrunda mübarizə aparacağımızı fikirləşmirdi. Əvvəldə bu cür hədəf yox idi. Amma komanda yaxşı mübarizə apardı.

- Bu sezon özün üçün necə keçdi? Az oynayacağını ehtimal edirdin? Yəqin ki, zaman keçdikcə daha çox oyun şansı tapacaqsan?

- Təbii ki, burada daha çox oynamaq şansı tapmağın çətin olacağını başa düşürdüm. Amma "SKA-Xabarovsk"a keçidim yeni səviyyəyə qədəm qoymaq idi. Əlbəttə, daha çox oynamaq istəyərdim. Fikrimcə, zamanla hər şey qaydasına düşəcək.

- Maraqlıdır, sənə Rusiya və ya Azərbaycan klublarından təkliflər var? Yayda komandanı tərk edəcəksən?

- Mənim "SKA-Xabarovsk"la müqaviləm var. Mövsümün qalan hissəsinə hazırlaşıram.

- Ümumiyyətlə, gələcək karyerasını Rusiya Premyer Liqasında, yoxsa Azərbaycan Premyer Liqasında təsəvvür edirsən, xəyal edirsən? Azərbaycanda hansı klubda oynamaq sənin üçün maraqlıdır?

- Məncə daha böyük xəyallar qurmalısan. Təbii ki, hadisələrin belə inkişafını təsəvvür edə bilərəm. Azərbaycanda klublar arasında heç bir ayrıseçkilik yoxdur.

- Azərbaycanın U-21 yığmasına dəvət ediləcəksən. Artıq məşqçilər korpusu səninlə danışıb? Hansısa həyəcan var?

- Məşqçilər korpusu ilə ünsiyyət hələ qabaqdadır. Təbii ki, milliyə dəvət edilmək xüsusi hissdir. Bu, mənim üçün yaxşı təcrübədir. Özümü ən yaxşı tərəfdən göstərmək istəyirəm.

- Özünü Azərbaycanın A millisində də təsəvvür edirsən? Əsas məqsədin budur?

- Bəli, özümü millinin forması ilə təsəvvür edirəm. Amma karyeramın necə olacağını kim bilir ki? Əsas məqsəd ən yüksək səviyyədə oynamaqdır. Zaman hər şeyi göstərəcək.

İdman.biz