Idman.biz
"Mançester Yunayted"in keçmiş yarımmüdafiəçisi Ueyn Runi hesab edir ki, Maykl Kerrik "qırmızı şeytanlar"ın baş məşqçisi vəzifəsi üçün "mükəmməl" olacaq.
İdman.Biz xəbər verir ki, daha əvvəl Kerrikin yaxın gələcəkdə klubun müvəqqəti çalışdırıcısı olacağı bildirilirdi. Hazırda Darren Fletçer müvəqqəti olaraq komandaya rəhbərlik edir.
"İstər Maykl gəlsin, istər Fletç [Darren Fletçer], istər Con O'Şi, istərsə də mən, klubu tanıyan insanlara ehtiyac var.
Yaxud Roy Kin — bilirəm ki, Royun bu məsələ ilə bağlı öz fikri var; mən onun gəlişi barədə mövsümün əvvəlində danışmışdım. Klubu tanıyan, kluba qayğı göstərən və "Mançester Yunayted" oyunçusu olmağın nə demək olduğunu başa düşən insanlara sahib olmaq — klubun ehtiyacı olan budur.
Klub öz kimliyini, ailə hissini itirib, belə demək olar. İstər Ole (Qunnar Solskjaer), istərsə də Maykl olsun, bu, "Mançester Yunayted" ruhunu geri qaytarmaq üçün bir fürsətdir.
Əlbəttə ki, mən (məşqçilər heyətinə) qoşulmağa hazıram. Bu, göz qabağındadır.
Yeri gəlmişkən, mən burada iş üçün yalvarmıram. Sadəcə hamının bilməsi üçün, əgər məndən soruşsalar, əlbəttə ki, qəbul edəcəyəm. Menecerin təyin edilməsi ən vacib şeydir", - Runi "The Wayne Rooney Show" podkastında deyib.
