Idman.biz
Futbolçu üçün ilk qol həmişə yaddaqalan olur və mən də bunu karyeramda önəmli addım kimi dəyərləndirirəm.
İdman.biz xəbər verir ki, bu sözləri AZƏRTAC-a açıqlamasında Xorvatiyanın "Varazdin" klubunda çıxış edən azərbaycanlı futbolçu Rüfət Abdullazadə komandasının heyətində vurduğu ilk qol barədə danışarkən deyib.
24 yaşlı oyunçu bildirib ki, Xorvatiya Kubokunda "Qay Maçe" kollektivinə 7:1 hesabı ilə qalib gəldikləri matç onun üçün çox önəmli olub: "Çünki Avropada rəsmi qarşılaşmalarda ilk qolumu vurdum. Oyuna əsas heyətdə başlamaq və erkən qol vurmaq mənə əlavə inam verdi. Rəqib iddialı komanda olmasa da, bu qol mənim üçün başlanğıc xarakteri daşıyır".
O, meydana çıxdığı andan etibarən məsuliyyət hiss etdiyini vurğulayıb: "Açığı, həyəcan yox idi. İlk dəfə əsas heyətdə meydana çıxmaq mənim üçün böyük önəm daşıyırdı. Oyuna daxil olduqca ritmi hiss etməyə başladım, komanda yoldaşlarım da daim dəstək oldular. Qoldan əlavə, meydanda hərəkətim, topdan kənar oyunum və müdafiəyə verdiyim dəstək də vacib idi. Çünki yalnız qol vurmaqla iş bitmir. Əsas məsələ komandanın oyun sisteminə uyğunlaşmaqdır. Bu oyunda qol vurmaq mənim üçün xüsusi əhəmiyyət kəsb edirdi. Çünki ötən həftə "Dinamo Zaqreb" qarşısında asist etmişdim və qarşıda bizi digər böyük klub — "Hayduk"la görüş gözləyir. Bu səbəbdən həm özümü göstərmək, həm də özümə olan inamı artırmaq baxımından bu qol çox dəyərli oldu".
Qeyd edək ki, Rüfət Abdullazadənin "Varazdin"lə müqaviləsi 2028-ci ilin yayına kimidir.
İdman.biz
