Idman.biz
"Şamaxı"nın müdafiəçisi Rüfət Abbasovun İdman.biz-ə müsahibəsi
- Azərbaycan Premyer Liqasının XXXI turunda "Kəpəz"lə oyunda 2:0 hesablı qələbə qazandınız. Matçı necə dəyərləndirirsiniz?
- Çətin oyun olacağını bilirdik. "Kəpəz"lə aramızda 3 xal fərq var idi. Öz meydanımızda oynayırdıq. Azarkeşlərimizi sevindirmək üçün qələbə qazanmaq istəyirdik və buna nail olduq.
- Sizcə, Tovuzda da bunu bacara biləcəksiniz?
- Hazırda komanda istirahət edir. İki gün dincələndən sonra bir araya gələcəyik. Tovuz səfərləri həmişə çətin olub. "Turan Tovuz"la qarşılaşmada məşqçilərin verdiyi tapşırıqları yerinə yetirib qələbə qazanmaq üçün vuruşacağıq. Bizi çətin oyun gözləyir.
- "Şamaxı" turnir cədvəlində yeddincidir. Sizcə, aşağı pillələrdə qərarlaşmağınızın səbəbləri nələrdir?
- Bu pillədə olmağımız normaldır. Mövsümün əvvəlində qoyulan məqsəd Premyer Liqada qalmaq idi. Ancaq biz bununla kifayətlənməyəcəyik. Bacardığımız qədər üst pillələr üçün oynayacağıq. Bildiyiniz kimi, Çempionatın ən aşağı büdcəli komandasıyıq. Buna baxmayaraq, bizdən büdcə baxımından üstün olan komandalara qarşı çox yaxşı mübarizə aparırıq, yaxşı oyunlar göstəririk. Son beş matçda da qələbə üçün meydana çıxacağıq.
- Gələcək karyeranızla bağlı planlarınız nələrdir? Yaxın müddətdə komanda dəyişməyi düşünürsünüz?
- Klubla növbəti mövsüm üçün də müqaviləm var. "Şamaxı"da özümü xoşbəxt hiss edirəm.
- Çempionatımızın hazırki durumunu necə şərh edərdiz?
- Bu il çempionat olduqca gərgin keçir. İstər aşağı, istər yuxarı pillələrdə avrokuboklar üçün gərgin mübarizə gedir. Məncə, ildən-ilə çempionatın səviyyəsi qalxır.
Aytac Sahəd
İdman.biz
