Lent.az
Keçmiş İspaniya Kral Futbol Federasiyasının prezidenti Luis Rubiales, futbolçu Cenifer Ermosonu öpməsi ilə bağlı qalmaqaldan sonra, "Rubialesin qətli" adlı kitabının təqdimatı zamanı yumurta yağışına tutulub.
Lent.az xəbər verir ki, hadisə zamanı bir kişi auditoriya qarşısında müsahibə verən Rubialesə üç yumurta atıb. Sonradan məlum olub ki, həmin şəxs Rubialesin əmisi imiş.
Rubiales bu barədə belə deyib:
"Bu, mənim əmisidir, adı Luis Ruben. Mənimlə həmyaşıddır. Mənə yumurta atdı, çünki o normal deyil və düşünmürəm ki, bunun hər hansı bir bəhanəsi ola bilər. Onu saxladılar, apardılar və ümumiyyətlə, ona qarşı tədbir görməli olacağıq. Çünki mən həqiqətən onun silahlı olduğunu düşündüm".
"Rubialesin qətli" adlı kitab Rubialesin Cenifer Ermoso ilə öpüş qalmaqalı barədə öz versiyasını təqdim edir. Nəşriyyat iddia edir ki, bu kitab Rubialesə qarşı "daima yalan və uydurmaların necə fabrikləşdirildiyini və onun cəmiyyətdə korrupsioner şəxs kimi göstərilməsi üçün məhkəmələrə şikayətlər verilməsinə necə zəmin yaradıldığını" nümayiş etdirir.
İspaniya məhkəməsi daha əvvəl Rubialesin Ermosonu öpməsinə görə onu seksual xarakterli zorakılıqda təqsirli bilmiş və 10 min avrodan çox cərimə kəsmişdi. Ona həmçinin bir il ərzində Ermoso ilə ünsiyyət qurmaq və ona 200 metrdən çox yaxınlaşmaq qadağan olunmuşdu. Rubiales qərardan apellyasiya verərək bildirib ki, öpüş "qələbənin sevinc anında edilən sevinc jesti idi" və futbolçunun seksual azadlığına təcavüz deyildi.
Xatırladaq ki, 2023-cü ilin avqustunda Rubiales İspaniya Kral Futbol Federasiyasının prezidenti olarkən qalmaqalın mərkəzinə düşmüşdü. İspaniya millisinin qadınlar üzrə dünya çempionatında qələbəsindən sonra mükafatlandırma mərasimində o, Ermosonu dodaqlarından öpmüşdü.
2025-ci ilin fevralında Madriddə Rubialesin məhkəmə prosesi keçirilib. Dinləmələrdə keçmiş prezident bildirib ki, Ermoso öpüşə razılıq verib, amma iki gün sonra fikrini dəyişib. Ermoso isə bildirib ki, heç nə eşitməyib və başa düşməyib, çünki Rubiales onun qulaqlarını əlləri ilə tutub və ardından öpüb.
