Sport24.az
Mövsümə uğursuz start verən "Mançester Yunayted"in baş məşqçisi Ruben Amorim İngiltərə mətbuatına açıqlama verib. Sport24.az xəbər verir ki, portuqaliyalı mütəxəssis 3-4-3 taktiki sistemini dəyişməyəcəyini bildirib:
"Heç kim, hətta Roma Papası belə, sistemimi dəyişdirə bilməz. Bu, mənim işim, məsuliyyətim və həyatımın bir hissəsidir. Dəyişiklik olmayacaq, amma inkişaf mərhələli şəkildə baş verəcək. Bütün addımların düzgün atılması vacibdir,"
Məşqçi vurğulayıb ki, təzyiq altında sistem dəyişikliyi etməsi futbolçuların ona münasibətini dəyişdirə bilər:
"Əgər indi dəyişsəydim, oyunçular mənə başqa cür baxardılar. Qərarların komandaya təsiri böyükdür, buna görə hər addım diqqətlə ölçülüb-biçilmiş olmalıdır."
O, öz metodunu davam etdirəcəyini və nəticələrin zamanla dəyişəcəyini qeyd edib:
"Mən işimi öz üsulumla görürəm. Başqaları fərqli yanaşır, amma nəticələr dəyişəcək. Sadəcə oyunları qazanmağa, növbəti görüş üçün ən yaxşı variantı tapmağa çalışıram."
