Idman.biz
"Mançester Yunayted"in baş məşqçisi Ruben Amorim İngiltərə Premyer Liqasının 20-ci turunda "Lids Yunayted"lə 1:1 hesablı heç-heçə ilə başa çatan oyundan sonra klubdakı funksiyası barədə açıqlama verib.
İdman.Biz xəbər verir ki, portuqaliyalı mütəxəssis ESPN-ə müsahibəsində kluba sırf məşqçi kimi yox, menecer kimi gəldiyini və bu statusla 18 ay işləmək barədə razılaşması olduğunu bildirib.
"Mən buraya "Mançester Yunayted"in məşqçisi olmaq üçün yox, meneceri olmaq üçün gəlmişəm və bu, açıq-aşkardır. Bilirəm, mənim adım Tuxel deyil, Konte deyil, Mourinyo deyil, amma mən "Mançester Yunayted"in meneceriyəm. Və bu, 18 ay belə olacaq və ya rəhbərlik məni dəyişənə qədər davam edəcək. Mən öz işimi görəcəyəm, skautlar, idman direktoru və bütün şöbələr də öz işlərini görməlidir. 18 ay işləyəcəyəm, sonra baxacağıq. Mən getmək niyyətində deyiləm. Məni əvəz edəcək biri gələnə qədər qalacağam. Bu, razılaşmanın bir hissəsidir. Mənim işim məşqçi olmaq deyil", - deyə Amorim söyləyib.
Qeyd edək ki, Premyer Liqada 20 turdan sonra "Mançester Yunayted" 31 xalla turnir cədvəlinin beşinci pilləsində qərarlaşıb.
