Sport24.az
"Mançester Yunayted"in baş məşqçisi Ruben Amorim İngiltərə Premyer Liqasının 28-ci turunun "Arsenal"la oyunu (1:1) öncəsi və oyun zamanı "qırmızı şeytanlar"ın azarkeşlərinin etirazından danışıb. Sport24.az xəbər verir ki, portuqaliyalı mütəxəssis bununla bağlı Sky Sport-a açıqlama verib:
"Aydındır ki, bu klub heç vaxt ölməyəcək, bu, göz qabağındadır. Bunu təkcə stadionda deyil, küçələrdə də hiss edirsən. Amma siz də bilirsiniz ki, bu, böyük biznes layihəsidir. Bəlkə də bunu bütün azarkeşlər hiss ediblər ki, bəzən oyunlara getmək üçün bilet almaq çətinləşir. Biz daim belə oynamayacağıq və hazırda oyunlarda qalib gəlməyə çalışırıq".
Qeyd edək ki, "Mançester Yunayted"in "The 1958" fanklubunun üzvləri azarkeşlərə Premyer Liqanın 28-ci turunun "Arsenal"la oyunu öncəsi etiraz aksiyasına çıxmağa və klubun yavaş-yavaş ölümünü simvolizə edən qara paltar geyinməyə çağırıb.
