Roy Kehat Vaqif Cavadovdan üzr istədi - “Aqressiv reaksiya verdimsə...”

"Sumqayıt"ın futbolçusu Roy Kehatın Sport24.az-a müsahibəsi.

"Səbail"i minimal hesabla məğlub etdiniz. Oyun haqda nə deyə bilərsən?

- Düşünürəm oyunun  çox hissəsini rəqibdən yaxşı oynadıq. Qələbə qazanmağı haqq edirdik. Əlbəttə, "Səbail"in penalti zərbəsinin dirəyə dəyməsində bəxtimiz gətirdi.

Vaqif Cavadovun gəlişindən sonra ilk qalibiyyətinizi qazandınız. Davamını gətirə biləcəksiniz?

-Bəli, daha çox oyunda qalib gələ bilərik. Lakin hər oyun çətin keçir. Xal qazanmaq istəyiriksə, hər matçda daha yaxşı performans göstərməliyik. 

- İkinci hissədə əvəzlənən zamanı baş məşqçiyə narazılığını bildirdin. Nə baş vermişdi?

- Hər bir oyunçu mümkün qədər çox oynamaq istəyir. Mən meydanda olmaq və komandama qələbə qazanmaqda kömək etmək istəyirəm. "Səbail"lə oyunda yaxşı oynadım. Vaqif Cavadovun məni əvəzləmək qərarına hörmət edirəm. Əgər aqressiv reaksiya verdimsə, ondan və komandadan üzr istəyirəm. Məşqçi bir oyunçunu əvəz etmək qərarına gəldisə, hər bir oyunçu bunu qəbul etməlidir.

- Ötən il Konfrans Liqasında çıxış etmiş "Sumqayıt"ın bu ilki hədəfi nədir?

- Bildiyiniz kimi indiyə qədər işlərimiz çətin keçir. İlk dövrədə çox xal itirdik.Mövsümün hədəfini yalnız mövsümün sonuna yaxınlaşdığımız zaman demək olar.

- Növbəti tur "Sabah"la çətin oyun var. Gözləntiniz necədir?

- "Sabah" Azərbaycanın ən yaxşı komandalarından biridir. Bu oyun çox çətin olacaq. Amma biz hər oyuna qələbə üçün çıxırıq.