"Atırau" mənə daha bir illik müqavilə təklif etdi. Sadəcə, klub əvvəlki sözləşmədə bəzi bəndləri yerinə yetirmədiyinə görə onlarla davam etmək istəmədim". Bu sözləri Sport24.az-a açıqlamasında qapıçı Rövşən Hüseynli deyib.
Futzal millisinin qolkiperi başqa təklifləri olsa da, "Astana"nı seçməsinin səbəbini açıqlayıb: "Həm Azərbaycandan, həm də başqa ölkələrdən dəvətlər var idi. Menecerim Marat Salyanskiylə xeyli götür-qoydan sonra Qazaxıstanın digər təmsilçisi "Astana"dan gələn təklifi dəyərləndirdik. Seçim edərkən tək karyeramı yox, həm də şəraiti də nəzərə aldıq. Ailəliləyəm, tək özümü düşünə bilmərəm. Bu səbəbdən "Astana" ilə 1 illik müqavilə bağladım".
Hüseynli hazırda Almaniyada davam edən qitə çempionatı ilə bağlı fikirlərini bölüşüb, azarkeşlik etdiyi millinin adını çəkib: "AVRO-2024 maraqlı oyunlar və sürpriz nəticələrlə diqqət çəkir. Fikrimcə, irəlidə də sürprizlər görəcəyik. İspaniya yığmasına azarkeşlik edirəm və onları finalda görürəm".
ABDULLA İSMAYILOĞLU