Sport24.az
"Sumqayıt"ın futbolçusu Rövlan Muradov Sport24.az saytına müsahibə verib. O, son oyunda "Sabah"ı məğlub etdikləri oyundan və komandasının bu mövsüm hədəfindən söz açıb.
- Oyunun favoriti "Sabah" olsa da, onları məğlub edə bildiniz.(0:1) Oyunla bağlı nə deyə bilərsən?
- Çox şükür qələbə qazana bildik. Soyuq havada bizə sona qədər dəstək olan azarkeşlərimizi sevindirməyi bacardıq. Çox ağır oyun oldu. Hava şəraiti müəyyən çətinlik yaradırdı. "Sabah" komandasının keyfiyyətli futbolçuları var. Sevindirici hal odur ki, sonda qalib gələ bildik.
- Vaqif Cavadovun gəlişindən sonra bu mövsüm uğurlu çıxış edirsiz. Cavadov komanda da nəyi dəyişə bilib?
- Vaqif müəllimin bizə inamı yüksəkdir. Hər bir futbolçuya güvənir. Bizə meydanda rahat olmağımızı, bir-birimizə və qələbəyə inanmağımızı tövsiyyə edir.
- "Sabah"a vurduğunuz yeganə qolun ötürməsini sən etdin. Daha öncə də belə epizodlarda Kehatla işbirliyiniz olub. Məşqlərdə bununçün xüsusi hazırlaşırsınız, ya təsadüfdür?
- Heç bir sirri yoxdur. Roy Kehatla yaxşı anlaşırıq.
- "Sumqayıt"ın hazırkı hədəfi nədir?
- Bütün çıxdığımız oyunlarda sona qədər mübarizə aparıb qalib gəlmək istəyirik.
- Qarşıda "Araz Naxçıvan"la oyun var. Gözləntilərin nədir?
- "Araz Naxçıvan" çox yaxşı təşkilatlanış komandadır. Rəqib futbolçuların çoxusu ilə "Qəbələ"də çıxış etmişik, onlarla tanışam. Çətin oyun bizi gözləyir. İnanırıq 90 dəqiqənin yekununda qalib tərəf biz olacayıq.
- Qarşıda milli komandamızın Estoniya və Slovakiya yığması ilə oyunları var. Fernando Santoşdan dəvət gözləyirsən?
- Bütün futbolçuların hədəfi milli komandaya çağırılmasıdır. Mənim üçün də dəvət önəmlidir. Yığmamız ölkəni təmsil edir. Layiq olub dəvət alsam, sevinərəm. Azərbaycan millisində oynamaq şərəfdir.
