Idman.biz
Səudiyyə Ərəbistanının "Əl-Nəsr" klubunun hücumçusu Kriştianu Ronaldu Corcina Rodriges ilə toyundan sonra Kaşkayşdakı malikanəsini satmaq niyyətindədir.
İdman.Biz-in Daily Mail-ə istinadən verdiyi məlumata görə, beşqat "Qızıl top" mükafatı sahibi təxminən 40 milyon dollar dəyərində qiymətləndirilən lüks əmlakdan ayrıla bilər. Malikanə artıq tam tikilib. O, səkkiz yataq otağı, üzgüçülük hovuzu, yeraltı dayanacaq və özəl kinoteatrdan ibarətdir.
Potensial satışa Ronaldunun şəxsi həyatın toxunulmazlığından narazılığı səbəb olduğu bildirilir. Futbolçu həmçinin təhlükəsizliyi artırmaq üçün qonşu otelə məxsus torpaq sahəsini, eləcə də qolf meydançasını almağa cəhd edib, lakin onun təklifləri rədd edilib.
Kaşkayşdakı villanın Ronaldu və Rodrigesin toy mərasimi üçün istifadə edilə biləcəyi, bundan sonra əmlakın satışa çıxarılacağı bildirilir. Cütlük 2016-cı ildən bəri birlikdədir və onların birlikdə iki qızı var. Ronaldu avqust ayında Corcinaya evlilik təklifi edib və toyun ABŞ, Meksika və Kanadada keçiriləcək 2026-cı il Dünya Çempionatından sonra keçirilməsi planlaşdırılır.
