Idman.biz
"Turnir cədvəlində yuxarı pillələrə yüksəlmək üçün zəif tərəflərimiz üzərində işləməyə davam etməliyik".
Bunu "Sumqayıt"ın hücumçusu Ronaldo Vaskez sportal.az-a müsahibəsində bildirib.
Həmin müsahibəni təqdim edirik:
- "Sumqayıt" 8-ci turda "Karvan-Yevlax" üzərində inamlı qələbə qazandı. Əslində, bu qələbə çoxları üçün sürpriz deyildi. Bəs, özünüz üçün necə?
- Turnir cədvəlinə xal əlavə etmək baxımından hər qələbə vacibdir. Komanda bu görüşdə çox yaxşı idi. Ümid edirik ki, eyni ruhda da davam edəcəyik.
- Demək olar ki, bu mövsüm qarşılaşdığınız ən zəif rəqib "Karvan-Yevlax" idi?
- İlk hissədə onlar bunu göstərmədilər. İkinci hissədə zonalar tapdıq və oyunu bitirə bildik.
- Komanda bir müddət əvvəl lider idi. Amma hazırda 5-ci pillədəsiniz. Səncə, nəyə görə belə oldu?
- Turnir cədvəlində yuxarı pillələrə yüksəlmək üçün zəif tərəflərimiz üzərində işləməyə davam etməliyik. "Karvan-Yevlax"a qarşı evdə qazanılan bu qələbə komandaya xal toplamaqda böyük ruh verir.
- İkinci turdan sonra isə "Sumqayıt" qalibiyyət əldə edə bilmirdi. Yalnız "İmişli"yə texniki qələbə ilə qalib gəlmişdiniz. Ola bilər ki, "Qarabağ" üzərindəki qələbə sizi eyforiyaya salmışdı?
- "Qarabağ"a qalib gəlmək vacib idi. Amma məncə, özümüzə daha çox diqqət yetirməli və hər matçda artırmalıyıq. Biz yalnız irəliyə baxırıq.
- Ümumiyyətlə, necə düşünürsən "Sumqayıt" avrokuboklara vəsiqə qazana biləcək? Komanda bu mövsüm daha da güclü görünür?
- Avrokuboklara getmək istəyirik və bunun üçün çox çalışırıq. Bunun asan olmayacağını bilirik. Amma mümkünsüz də deyil. Biz buna nail ola bilərik.
- Növbəti turda rəqibiniz "Zirə"dir. Bu matçda qələbə qazanmaq şanslarınızı necə dəyərləndirirsən? "Zirə" son turda "Sabah"a uduzdu...
- Bu matça ən yaxşı şəkildə hazırlaşırıq. Onların çətin rəqib olduğunu bilirik. Lakin rəqibə hücumda çox zərər verə bilərik.
- Artıq 2024-cü ildən "Sumqayıt"da oynayırsan. Maraqlıdır, Azərbaycanın fərqli klublarından təkliflər almısan heç, yoxsa gələcəyini "Sumqayıt"da düşünürsən?
- Bütün diqqətimi bu mövsümə yönəltmişəm. Hazırda "Sumqayıt"ın futbolçusuyam və komandanın daha yaxşı mövqeyə çıxması üçün əlimdən gələni edəcəyəm.
- Dominikan Respublikası millisinə dəvət edilirdi. Komanda öz qrupunda 3-cü pillədədir. Yəqin ki, siz də dünya çempionatına çıxmaq üçün oynayırdınız. Səncə, bunu reallaşdıra biləcəksən gələcəkdə? Dominikan Respublikası millisini Azərbaycan yığmasından güclü hesab edirsən?
- Dominikan Respublikası milli komandasının çox yaxşı oyunçuları var. Biz bir ailəyik, bu, hər şeyi asanlaşdırır. Biz futbolda yüksəlişdə olan ölkəyik və öz ölkəmi Azərbaycanda təmsil etməkdən çox qürur duyuram. Deməzdim ki, biz Azərbaycandan daha yaxşı və ya pisik, amma biz Avropanın mühüm liqalarında oyunçuları olan bir komandayıq. Ölkəmin millisində dünya çempionatına vəsiqə qazanmaq mənim üçün arzu olardı.
