Idman.biz
Braziliya millisinin sabiq hücumçusu Romario 2026 Dünya Çempionatı ilə bağlı paylaşımı ilə gündəm yaradıb. Əfsanəvi futbolçu "Instaqram" hesabında yayımladığı paylaşımda millinin üzvlərini açıq şəkildə təhdid edib.
İdman.Biz xəbər verir ki, söhbət süni intellektlə hazırlanmış, qəsdən şişirdilmiş və zarafat xarakteri daşıyan bir görüntüdən gedir. Şəkildə Romario Rio-de-Janeyro favelalarından (aztəminatlı əhalinin yaşadığı qeyri-rəsmi yaşayış məhəllələrinə verilən ad) birində Ronaldinyo, Ziko və Adriano ilə birlikdə təsvir olunub. Onlar əlində beysbol dəyənəyi ilə hazırkı Braziliya millisinin ulduzlarını "xəbərdar edən" obrazda təqdim ediliblər.
Digər tərəfdə isə Neymar, Vinisius, Rodriqo və Rafinya səkidə oturmuş vəziyyətdə, sanki böyük futbol əfsanələrinin nəsihətini dinləyən şagirdlər kimi göstərilib.
Romario paylaşımına belə bir şərh əlavə edib:
"Əgər biz qazanmasaq, bizim üçün yaxşı olmayacaq".
Bu ifadə zarafatın əsas məğzini formalaşdıraraq paylaşımın qısa müddətdə viral olmasına səbəb olub. Sosial şəbəkə istifadəçiləri bunu Braziliya futbol ənənələrinə ironik istinad və 2026 Dünya Çempionatı öncəsi psixoloji təzyiqin yumorla ifadəsi kimi qiymətləndiriblər.
Qeyd edək ki, Braziliya millisi tarixində beş dəfə Dünya Çempionu olub və hər mundial öncəsi ölkədə gözləntilər ən yüksək səviyyədə olur. Romarionun paylaşımı da məhz bu ənənəvi təzyiqi simvolik şəkildə əks etdirib.
