Idman.biz
Nikolo Dzaniolo "Roma"nın gənclər komandasının futbolçuları ilə münaqişə yaşayıb
İdman.biz xəbər verir ki, 25 yaşlı futbolçu hazırda "Qalatasaray"dan icarə əsasında "Fiorentina"da çıxış edir.
O, İtaliya gənclər liqasının yarımfinalında "Fiorentina" ilə "Roma" arasında keçirilən matçı izləyib.
"Sportitalia"nın məlumatına görə, "Roma"nın sabiq yarımmüdafiəçisi romalıların paltardəyişmə otağına daxil olub və bir neçə oyunçu ilə mübahisə edib. Vəziyyət gərginləşib və dava-dalaşa çevrilib. Dzaniolo iki oyunçunu vurmaqda ittiham olunub.
"Roma" hadisə ilə bağlı öz versiyasını yayımlayıb: "İlk məlumatlara görə, Dzaniolo oyundan sonra komandanın paltardəyişmə otağına daxil olub və "Roma"nın gənclər komandasının bir neçə üzvünə qarşı təhrikedici davranış nümayiş etdirib. Mübahisə zamanı iki oyunçu fiziki zərbə alıb. "Roma" idmanda hörmətə və dəyərlərə zidd olan hər cür aqressiv davranışı qəti şəkildə pisləyir."
Dzaniolo isə bildirib ki, "Roma"nın paltardəyişmə otağına salamlaşmaq üçün gedib, amma orada onu təhqir ediblər.
"Fiorentina"nın bəyanatında isə Dzaniolonun dedikləri belədir: "Matçdan sonra "Fiorentina"nın oyunçularını təbrik etmək üçün paltardəyişmə otağına endim, sonra isə "Roma"nın paltardəyişmə otağına gedib, onları salamlamaq və mövsümün bitməsi münasibəti ilə təbrik etmək istədim. Amma birdən onlar məni təhqir etməyə başladılar, ona görə də vəziyyətin gərginləşməməsi üçün həmin anda oradan ayrılmağa qərar verdim".
İdman.biz
