Roman Qriqorçuk: "Hər oyundan-oyuna sağlamlığımı itirirəm"

"Strateji olaraq, ilk dəqiqədə qol buraxmaq xoş deyil. Amma futboldur, belə şeylər olur. İstənilən halda, bugünkü kimi futbol oynamaq qəbulolunmazdır. Heç bir şey bizi sarsıda bilməz ki, istədiyimiz futbolu oynaya bilməyək". Sport24.az xəbər verir ki, bu sözləri "Neftçi"nin baş məşqçisi Roman Qriqorçuk Premyer Liqanın VI turunun "Zirə" ilə oyunundan sonra keçirilmiş mətbuat konfransında deyib.

O, ardınca jurnalistlərin suallarını da cavablandırıb.

- Milli fasilədə "Neftçi"nin özünə gələcəyini gözləmək olardı. Amma bu gün 90 dəqiqə ərzində qol epizodunuz da yox idi. Belə futbolla "Qarabağ"la matçda komandanızdan nə gözləmək olar?

- Bu cür oyunla nəsə gözləmək çətindir. Biz istənilən halda, daha yaxşı oynamalıyıq. Son konfransda da demişdim ki, fasilə bizə daha yaxşı təsir edəcək. Amma sözlərimi tuta bilmədim. Buna görə üzr istəyirəm. Bu cür futbola görə hamımız üzr istəməliyik.Belə futbol oynamaq olmaz.

- "Neftçi" hazırda Premyer Liqada ən az top vuran iki komandadan biridir. Hücum xəttindəki bu passivliyi nə ilə izah edərdiz?

- Hamımız görürük ki, hücum xəttində axsayırıq. İstədiyimiz kimi çıxış etmirik. 

- "Neftçi" uduzduqca, sizin də bu komandada karyeranız sona yaxınlaşır?

- Hər oyundan-oyuna sağlamlığımı itirirəm. Belə futbol oynamaq heç də xoş deyil.

- Sizcə komandanız "Qarabağ"ı udmaq potensialındadır?

- Bizim daha yaxşı futbol oynamağa potensialımız var və bu istiqamətdə də davam edəcəyik. Bu gün qol buraxdıq. Məğlub olmağımızın səbəbi ilk dəqiqələrdə buraxdığımız qol ola bilərdi. Amma belə deyil. Məsuliyyəti dərk edərək deyə bilərəm ki, daha yaxşı oynamaq üçün potensialımız var.