İdman.biz
"İstədiyimiz kimi oynamırıq. Xallar qazana bilmirik. Bu gün məğlub olduq. Həm də məğlubiyyətə layiq oyun göstərdik".
İdman.biz xəbər verir ki, bunu "Neftçi"nin baş məşqçisi Roman Qriqorçuk deyib.
Ukraynalı mütəxəssis Azərbaycan Premyer Liqasının III turunda "Sabah"a 0:2 hesablı məğlubiyyəti şərh edib. O, bəzi futbolçuların obyektiv səbəblərdən hazır olmadığını bildirib: "Artıq 3 turdur azarkeşlərimizə qələbə bəxş edə bilmədiyimiz üçün narazıyıq. Buna görə də hər şey neqativ görünür. Komandamıza yeni futbolçuların qoşulması sevindirici haldır. Transfer işlərinin üzərində çalışırıq, amma bu proses bitməyib, davam edir. Hər bir futbolçunun oyununa nəzər yetirib, onları mühakimə etmək üçün ən azı 5-6 tur lazımdır. Bəzi oyunçularımız obyektiv səbəbdən tam hazır deyillər. Çünki bundan əvvəl son oyunlarını may ayında keçiriblər. Buna görə də hələ indi komandaya uyğunlaşmağa cəhd göstərirlər. Klubdan narazı olmağımla bağlı çıxan söz-söhbətləri indi sizdən eşidirəm və bunun heç bir əsası yoxdur".
Qeyd edək ki, "Neftçi" 2 oyunda heç-heçə edib, 1 dəfə uduzub.
İdman.biz
