Idman.biz
"Mançester Siti"nin dayaq yarımmüdafiəçisi Rodri hələlik gələcəyi ilə bağlı qərar verməyib.
İdman.biz AS nəşrinə istinadən xəbər verir ki, "şəhərlilər" yaxın günlərdə 29 yaşlı futbolçuya yeni müqavilə təklif etməyi planlaşdırırlar.
Mənbənin məlumatına görə, İngiltərə klubu Madrid "Real"ının ispaniyalı futbolçuya ciddi maraq göstərdiyini bilir və bunu "real təhlükə" kimi qiymətləndirir. "Kral klubu"nun rəhbərliyi və baş məşqçi Xabi Alonso anlayır ki, hazırda transfer bazarında Rodri səviyyəsində dayaq yarımmüdafiəçisi yoxdur.
Öz növbəsində, "Mançester Siti" Rodriyə müqaviləsinin müddətinin 2029-cu ilə qədər uzadılmasını təklif etməyə hazırlaşır. Bu müqavilə onu Avropanın ən yüksək maaş alan yarımmüdafiəçisi edə bilər.
Rodri 2019-cu ilin yayından "Mançester Siti"nin heyətində çıxış edir. Bu müddət ərzində o, bütün turnirlərdə 265 oyuna çıxıb, 26 qol vurub və 32 məhsuldar ötürmə edib. Onun hazırkı müqaviləsi 2027-ci ilin yayına qədər qüvvədədir. "Transfermarkt" portalının məlumatına görə, futbolçunun transfer dəyəri 110 milyon avrodur.
Qeyd edək ki, iyulun 1-də klubların dünya çempionatı çərçivəsində "Əl-Hilal"la oyunda yenidən ciddi zədə alan Rodri artıq məşqlərə başlayıb.
İdman.biz
