Idman.biz
"Barselona"nın hücumçusu Robert Levandovski açıqlayıb ki, 2012-ci ildə baş məşqçi Ser Aleks Fergüsonun rəhbərliyi altında oynamaq üçün "Mançester Yunayted"ə keçmək istəyib.
İdman.biz xəbər verir ki, bu keçid baş tutmayıb, çünki polşalının o vaxtkı klubu "Borussiya Dortmund" transferə icazə verməyib.
Levandovski 2014-cü ilin yayında azad agent kimi "Bavariya"ya keçib. Təcrübəli futbolçu BBC-yə müsahibəsində o illəri belə xatırlayıb: "Mançester Yunayted"ə keçmək qərarını vermişdim. Aleks Fergüsonla çalışmaq istəyirdim. Dortmund klubu məni satmadı, çünki başa düşürdülər ki, əgər qalsam, daha çox pul qazana bilərlər. Onlar bilirdi ki, mən bir-iki il daha gözləyə bilərəm. Amma doğrudur ki, "Mançester Yunayted"ə "hə" demişdim".
Levandovski 2010-cu ildə Polşanın "Lex Poznan" klubundan Dortmund "Borussiya"sına keçməzdən əvvəl İngiltərənin "Blekbörn Rovers" klubunun da maraq dairəsində olub. O, karyerası ərzində Premyer Liqada oynamaması barədə qarışıq hissləri olduğunu bildirib: "Bəlkə də peşmanlıq ola bilər. Amma geriyə baxanda "Bavariya", "Borussiya Dortmund" və indi də "Barselona" kimi klublarda oynamışam, deməli, karyeramdan çox razıyam".
Levandovski Almaniyada parlaq karyera qurub. "Bavariya"nın heyətində 344 qolla klub tarixində Gerd Müllerdən sonra ən məhsuldar ikinci oyunçu olub. O, Münhendə keçirdiyi 8 mövsümün hamısında Bundesliqa çempionu olub və 2019/20 mövsümündə Çempionlar Liqasını qazanıb.
Uğurlu çıxış "Barselona"da da davam edib – burada üç mövsüm ərzində 2 La Liqa titulu, 2 İspaniya Superkuboku və 1 İspaniya kuboku qazanıb: "Mən heç vaxt elə hiss etməmişəm ki, nəyisə qaçırmışam. Çünki hər qərarı öz istəyimlə vermişəm".
Levandovski ötən mövsüm Çempionlar Liqası tarixində 100 və ya daha çox qol vuran oyunçular sırasına daxil olaraq, Kriştiano Ronaldo və Lionel Messiyə qoşulub. Hazırda o, peşəkar karyerasının 22-ci mövsümünə başlayır.
Bu ay 37 yaşı tamam olacaq polşalı futbolçu hələ də gənc oyunçularla rəqabət aparmaq üçün motivasiya hiss edir: "Əgər görürəmsə ki, mən hələ də onları yox, onlar məni yaxalamağa çalışır – bu, o deməkdir ki, qarşıdakı mövsüm də uğurlu ola bilər.
Mən hələ də öz ən yaxşı çıxışımı göstərmək üçün buradayam. Başa düşürəm ki, gənclərlə mübarizə apara bilmərəm, amma onlara kömək edə bilərəm və onlar da mənə kömək edə bilər. Mən onlardan çox şey öyrənirəm. Heç vaxt elə düşünməzdim ki, bu cür olacaq".
"Barselona"nın parlayan ulduzu Lamin Yamal haqqında da danışan Levandovski onun bacarığını hələ 2022-ci ildə əsas komanda ilə ilk məşqində görüb: "Bu, həyatımda ilk dəfə idi ki, 50 dəqiqədən sonra başa düşdüm – o, nəsə xüsusi bacarığa sahibdir. İnanmadım, çünki bu yaşda belə bir futbolçunu görməmişdim – 15 yaşında bu mümkün deyil, deyə düşünürdüm".
Hazırda 18 yaşlı Yamal bu il "Qızıl top" mükafatını qazanmağa əsas namizədlərdən biridir: "Yamalın keçirdiyi mövsüm inanılmaz idi. Həm də onun hələ çox vaxtı var, bu il olmasa da, bəlkə gələn il mükafatı qazana bilər".
İdman.biz
