Riad Rəfiyev: “Bu tək bizim yox, Azərbaycan futbolunun problemidi”

"Sumqayıt" – "Səbail" matçını izləyənlər arasında "kimyaçılar"ın prezidenti Riad Rəfiyev də var idi. Qarşılaşmadan sonra "gənclik şəhəri"nin təmsilçisinin prezidenti Sport24.az-ın əməkdaşının suallarını cavablandırıb.

-Riyad bəy, oyundan razı qaldız?
- İlk dəqiqələrdən hiss olunurdu ki, "ağır" 90 dəqiqə izləyəcəyik. Qarşılaşmanın son dəqiqləri isə əsl triller oldu. Sevinirik ki, son saniyələrdə vacib qələbə qolunu vurduq. Təbii ki, turlar ötdükcə bizə daha çətin olacaq. Odur ki, "Səbail" üzərində zəfərdən həm motivasiya almalı, həm də çatışmazlıqları aradan qaldırmalıyıq.

- Sanki çempionata tam hazır deyilsiz. Komandada sabitlik çatmır...
- Fikirlərinizlə hardasa razıyam. Amma optimistik və vaxt ötdükcə çatışmazlıqlar aradan qalxacaq.

- "Transfer pəncərəsi"nin bağlanmasına bir neçə həftə var. Komandaya yeni futbolçu cəlb olunacaq?
- Bu həftə iki yeni futbolçu cəlb etmişik. Onların hər birinin qarşıdakı turlarda meydana çıxacağını və gücümüzə güc qatacağını gözləyirik. Hər halda baş məşqçimiz ehtiyac duysa və büdcə imkan versə transferlər ola bilər.

- Gözəl stadionunuz olsa da, əksər oyunlar demək olar ki, boş tribunalar qarşısında keçir...
- Bu tək bizim yox,  Azərbaycan futbolunun problemidi. "Qarabağ" kimi Avropaya səs salan klubun da oyunlarında demək olar, eyni mənzərəni görürük. Baxın, ağdamlıların avrokubok oyunlarında Tofiq Bəhramov adına Respublika stadionu dolur, amma Premyer Liqa matçlarına barmaqla sayılacaq qədər azarkeşlər gəlir.

- Sumqayıtın özünəxas ab-havası var. Burda futbolu sevirlər. Sizcə, azarkeş ənənəsi olan şəhərdə hansı tədbirlər görülməlidi ki, insanlar stadiona üz tutsun? 
- Söylədiklərinizlə razıyam, Sumqayıt təmsilçisilərinin daim güclü "12-ci oyunçu"su olub. Şəxsən mən də çox istəyirəm ki, "Xəzər"in, "Gənclərbirliyi"nin dönəmində stadiona gələn azarkeş axını təkrarlansın. Bu yöndə maksimum işlər də görürük. Ötən mövsüm gördüz ki, həm stadionun açılışında, həm də bir neçə başqa qarşılaşmada arenada demək olar boş yer qalmadı. Elə sizin sayt vasitəsiylə də əziz sumqayıtlılara üz tutub bizə dəstək olmağa çağırıram.

- Komandanın Konfrans Liqası ilə erkən vidalaşmağı klub prezidenti kimi sizə necə təsir etdi?
- Əlbəttə ki, çox pis. Təbii ki, cavan komandayıq, avrokuboklarda demək olar, təcrübəmiz yoxdu. Amma ən azı bir mərhələ keçmək istəyirdik, təəssüf ki, alınmadı. Necə deyərlər, bu da bizə bir təcrübə oldu, irəli baxmalı və inkişaf etməliyik.