Idman.biz
"Mançester Yunayted"in icarə əsasında "Barselona"da çıxış edən ingiltərəli hücumçu Markus Reşfordun Çeşir qraflığında (İngiltərənin şimal-qərbində yerləşir - red) tikmək istədiyi iqamətgahın inşasında problemlər yaranıb.
İdman.Biz "The Sun" nəşrinə istinadla xəbər verir ki, 27 yaşlı futbolçu layihənin inşasının dayanması və xərclərin kəskin artması səbəbindən 15 milyon funt sterlinqə qədər zərər görə bilər.
Məlumatda qeyd olunur ki, M. Reşford 2020-ci ildə başladığı layihə üçün 2,25 milyon funt dəyərində torpaq sahəsi alıb. O, içərisində hovuz, idman zalı olan və əlavə qonaq mənzilləri yerləşən dəbdəbəli villa inşa etdirməyi planlaşdırırıb.
Lakin məlumatlara görə, keçmiş qolf klubunun ərazisində tikinti işləri maliyyə mübahisələri səbəbindən bir neçə dəfə dayandırılıb. Futbolçu öz maliyyə komandasına layihənin niyə bu qədər ləng irəlilədiyini araşdırmağı və tikintinin başa çatma müddətini müəyyənləşdirməyi tapşırıb.
Sakinlərin sözlərinə görə, tikinti sahəsi tez-tez su altında qalır, texnika isə ərazidən demək olar ki, çıxmır. Yerli əhali otların ərazini basdığını və torpağın eroziyaya uğraması ilə bağlı narazılığını bildirib.
Buna baxmayaraq, tikintiyə cavabdeh olan "Noble Projects" şirkətinin nümayəndələri keyfiyyətlə bağlı heç bir problemin olmadığını və layihənin icrasını davam etdirdiklərini açıqlayıblar.
