Rəşad Sadıqov: "Uğurlu gedəndə fasilənin olmasını istəmirsən"

Misli Premyer Liqasının XXVII turunun "Sabah" - "Zirə" oyunundan (1:1) sonra qonaq komandanın baş məşqçisi Rəşad Sadıqov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi... 

- Çətin oyun alındı. İlk dəqiqələrdən hər iki komanda bir-birindən ehtiyat edirdi. Rəqibin qoluna qədər epizod yox idi. Uzaqdan zərbə hesabı açdı. Sekidikanın yaxşı zərbələrinin olduğunu bilirdik. Fasilədə toparlandıq və daha böyük qüvvə ilə irəli atıldıq və qol vurduq. Bundan sonra bərabər oyun keçdi. Düşünürəm ki, oyunun ədalətli nəticəsi heç-heçə idi.

- Qış fasiləsindən sonra müsbət tonusda davam edirsiniz. İndi fasilə necə təsir edəcək?

- Uğurlu gedəndə fasilənin olmasını istəmirsən. Oyun ərzində də belədir, yaxşı gedişatda pauza xoş gəlmir. Fasilənin xeyrimizə, ya zərərimizə olacağını görəcəyik. Vaxtdan səmərəli istifadə etməyə çalışacağıq. Bəzi çatışmazlıqlarımız var. Həlledici dövrə qarşıdadır.

- İsmayılın milliyə dəvəti haqda fikirlərinizi bilmək istəyirdim... 

- Bu, sevindirir. İnşallah, millidə yaxşı çıxış edər.

- Salifu Sumaya marağın böyük olması onun performansına təsir edir?

- Bu günə qədər hiss etməmişəm. Bu matçda "Sabah" onu saxlamışdı. Mənimçün vacib olan futbolçunun istəyidir. Məncə, Sumada bu gün daha çox yorğunluq var idi. Son periodda ən çox oynayanlardandır. İnanıram ki, fasilə ona faydalı olacaq.

- Millinin növbəti iki oyunu haqda fikirləriniz nədir?

- Yaxşı matçlardır. Nəticə önəmli deyil. Məşqçi komandanı sınaqdan keçirəcək.

- Son müsahibələrinizdə Ayxan Abbasovu tərifləmişdiniz. Onun U-21-ə təyinatı haqda nə deyə bilərsiniz?

- Onun və millinin adına yaxşı qərar oldu. Mən də onu namizəd görürdüm. İki yerdə işləmək Abbasov üçün müsbət olacaq. "Şamaxı" avrokuboklara getməyəcək və yeni mövsüm sıx qrafikdə olmayacaqlar. Onun bu işin öhdəsindən gələcəyini düşünürəm.