Rəşad Sadıqov: "İki cəbhə planı cızmırıq"

"Zirə" Azərbaycan Premyer Liqasının 2-ci turunda səfərdə "Sabah"ı 2:0 hesabı ilə məğlub edib. Sport24.az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında bu fikirləri səsləndirib: 

"Hər iki komandanın futbolçularına təşəkkür etmək istəyirəm. Ağır səfər matçından sonra iki komanda da sona qədər əzmkar mübarizə apardı. "Sabah" da qələbə qazana bilərdi. Sadəcə biz yararlandıq epizodlardan və qalib gəldik. "Sabah"a qarşı səfərdə oynamaq çox çətindir. Şükür Allaha vacib üç xal qazandıq. İki cəbhə planı cızmırıq. Qarşıda bizi Konfrans Liqasının vacib matçı gözləyir. Hər iki komandanın şansları bərabərdir. Transferlərin iki cəbhə ilə əlaqəsi yoxdur. Heyətin tamamlanması ilə bağlı transfer etmişik. Olsa, bir transfer olacaq. Olmasa da, əlimizdə yetərincə yaxşı futbolçular var. Hər iki komandada yorğunluq var idi. Amma futbolçular əzmkarlıq göstərdi. Mənim üçün derbi ab-havası var idi. Biz hesabda irəli çıxdıqdan sonra "Sabah" böyük qüvvə ilə irəli atıldı. Rəqibin müdafiəsində boşluqlar axtarırdıq. Mənim üçün derbi ab-havasında keçdi. Bu dəqiqədən sonra "Osiyek"lə oyun haqda düşünəcəyik. Biz məşqçilər heç vaxt kifayətlənmirik. Daim daha yaxşı olmağa, inkişaf etməyə çalışırıq. Mən şikayət edə bilmərəm, qələbələr qazanmışıq. Amma daha yaxşısı üçün çalışmalıyıq. Ən yaxşısını edəcəyik. Əlimizdə kifayət qədər yaxşı futbolçular var. Kollektivimdən razıyam. Mənim üçün futbolçunun çalışqan olması ən vacibidir. Mehribanlıq da həmçinin. Bunu da etmişik".

Qeyd edək ki, "Zirə" 2 turdan sonra "Qarabağ"la birlikdə ilk iki pilləni bölüşür.