İdman.biz
"Hər iki komanda əlindən gələni edəcək. Çətin oyun olacaq".
İdman.biz xəbər verir ki, bunu "Zirə"nin baş məşqçisi Rəşad Sadıqov Konqres Liqasının lll təsnifat mərhələsində "Osiyek"lə cavab matçından öncə keçirilən mətbuat konfransında deyib.
O, öncə Çempionlar Liqasında pley-offa yüksələn "Qarabağ"ı təbrik edib, avqustun 15-də Konfrans Liqasında oynayacaq "Sabah"a uğurlar arzulayıb. Sadıqov bildirib ki, komandasını da avrokubokda heç də asan keçməyəcək qarşılaşma gözləyir: "Vacib oyuna çıxacağıq. Hər iki komandanın heyətində iddialı futbolçular var ki, nəticə onların xeyrinə olsun. Nəyin necə olacağını zaman göstərəcək. Meydanın yaxşı vəziyyət olmaması üzücüdür. Vəziyyət daha da pisdir. Bu da texnikalı oyun nümayiş etdirmək üçün mane törədə bilər".
Qeyd edək ki, matç avqustun 15-də saat 20:30-da "Dalğa Arena"da keçiriləcək. Xorvatiyada baş tutan oyun 1:1 hesabı ilə bitib.
Banuçiçək Hüseynli
İdman.biz
