Sport24.az
Misli Premyer Liqasının XXIX turunda keçirilən "Qarabağ" – "Zirə" (1:0) matçından sonra qonaq komandanın baş məşqçisi Rəşad Sadıqov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə oyunla bağlı fikirlərini bölüşdü:
– Rəqibi təbrik edirəm. Ağır oyun oldu. "Qarabağ"la heç bir oyun asan keçmir. Amma futbolçularım əla mübarizə apardılar. Oyun rəqibin üstünlüyü ilə keçirdi. Biz daha çox mərkəzdə etibarlı olub, əks-hücumlara bel bağlayırdıq. Artıq 5-ci oyunda "Qarabağ" duran topdan 9-cu qolu vurur. Hələ də bunu həll edə bilmirik. Bu gün məğlubiyyət hissi ilə ayrılmıram burdan.
– Penaltini qaçıran oyunuçunu bağışlamaq olar?
– Niyə olmur ki? Özüm də qaçırmışam, ulduz futbolçular da qaçırıb. Təkcə penalti yox, başqa fürsətlərimiz də oldu. Sadəcə dəyərləndirə bilmədik.
– Ötən mövsüm də avrokuboklarda da göründü ki, penalti sarıdan əziyyət çəkirsiz. Bunun həlli yolu yoxdur?
– Mənə görə penaltinin məşqi yoxdur. Məsələn, mən məşqlərdə vururdum. Amma oyunda həyəcanlı olurdum. Qismət komandada çox kritik penaltilər yerinə yetirib. Bunun üzərində dayanmaq istəmirəm.
-Yusuf Lavalla son transferinizi bu mövsüm görəcəyik?
– Son transferimiz 2 ay məşqlərdən kənarda qalmışdı. Bu, daha çox gələcəyə yönəlik transfer idi. Lavalın isə müalicəsi gedir. Hazırda bərpa prosesi keçirir.
– Bu gün "Zirə"nin ən yaxşı halını görürük. Bu stabilliyi sona qədər görə biləcəyik?
– Çempionatda qələbə qazanmaq çətindir. Stabil olduğumuzu deyə bilmərəm. 7 oyuna 1 qələbəmiz olub. Gələcəklə bağlı danışmaq çətindir.
– Avrokuboklar üçün bu heyət yetərlidir?
– Bir şey bitməmiş bu haqda danışmaq doğru olmaz. Qarşıda ağır səfərlər var. Heç ağlımdan da keçmir. Bütün fikrimizi oyunlara vermişik.
