Sport24.az
"Kağız üzərində "Omoniya" favoritdi. Ancaq real yanaşsaq, şanslar bərabərdi. "Zirə" istər Premyer Liqada, istərsə də avrokuboklarda inamlı təsir bağışlayır, əsl komanda oyunu sərgiləyir. Rəşad Sadıqovun komandasının Konfrans Liqasının pley-offuna çıxması da söylədiklərimə təsdiqdi. Bu gün "Zirə"ni Nikosiyada çətin oyun gözləyir, amma təmsilçimizin uğur qazanmaq şansı var. Səfərdən sərfəli nəticəylə qayıtmaq önəmlidi. Kipr təmsilçilərinə qarşı uğurlu oyunlarımız olub. "Qartallar" da bundan motivasiya alıb meydana çıxmalıdı". Bu sözləri Sport24.az-a açıqlamasında Rəşad Sadiqov deyib.
Hazırda "Qarabağ"ın akademiyasında çalışan veteran futbolçu kiprli azarkeşlərin rəqibi daim təxribata çəkdiyini də vurğulamağı unutmayıb: "Futbol oynadığım dönəmdə həm "Neftçi", həm də "Qəbələ"nin heyətində "Apoel"ə qarşı oynamışam. Onların azarkeşləri çılğın, aqressiv və təxribatçıdılar. Adada ermənilərə rəğbət yüksək səviyyədədi. Kiprli azarkeşlər komandaları bir qədər axsayan kimi bizə qarşı separatçı şüarlar səsləndirməyə başlayırlar. Maksimum çalışırlar ki, futbolçularımızı təxribata çəksinlər. Fikrimcə, "Zirə"nin bugünkü oyununda da eyni ssenariyə şahidlik edəcəyik. Odur ki, Rəşad Sadıqovun komandasına son dərəcə təmkinli olmağı və onların məkrli niyyətlərinə uymamağı tövsiyə edirəm".
Qeyd edək ki, bu gün keçiriləcək "Omoniya" – "Zirə" matçının start fiti Bakı vaxtı ilə saat 21:00-da sələnəcək.
ABDULLA İSMAYILOĞLU
