Report.az
Futbol üzrə Azərbaycan millisinə özünə inamı qaytarmaq üçün bir qələbə lazımdır.
Bunu "Report"a açıqlamasında millinin sabiq yarımmüdafiəçisi Rəşad Abdullayev deyib.
"Hər iki oyunu izlədim. Onu deyə bilərəm ki, Latviya bizə uyğun rəqib idi. Səfərdə oynamağımıza baxmayaraq, yenə də qələbə qazana bilmədik. Macarıstan isə güclü, təcrübəli kollektivdir. Evdə oynadığımız üçün qələbə görmək istəyərdik. Baxmayaraq ki, rəsmi görüş deyildi. Yəqin ki, məşqçilər bu oyunlarda daha çox komandanın güclü və zəif tərəflərinə baxmaq istəyirdilər", - deyə 43 yaşlı mütəxəssis bildirib.
O, komandanın əzmkarlıq göstərməsinin vacibliyini vurğulayıb:
"Macarıstanla oyunda bir az yorğunluq hiss olunurdu. Oyunçular istəkli görünürdülər. Özünə inamı qaytarmaq üçün komandaya bir qələbə lazımdır. Taktiki planla bağlı bir söz deyə bilmirəm, bu, məşqçilərə aiddir. Ancaq istərdik ki, komanda əzmini göstərsin. Bir azərbaycanlı kimi istərdik ki, millimiz həmişə bizi qələbələrlə sevindirsin. Ümid edirik ki, rəsmi oyunlarda komandadan yaxşı nəticələr görəcəyik".
Qeyd edək ki, Fernandu Santuşun rəhbərlik etdiyi Azərbaycan millisi ötən gün Bakıda Macarıstan seçməsinə 1:2 hesabı ilə məğlub olub. İyunun 7-də Latviya ilə baş tutan oyun isə qolsuz bərabərliklə nəticələnib.
