Idman.biz
Mərakeş millisinin sabiq baş məşqçisi Valid Reqraqi "Real Madrid"in hücumçusu Kilian Mbappenin 2026-cı il üzrə "Qızıl top" mükafatını qazana bilməməsinə münasibət bildirib. Mütəxəssis hesab edir ki, fransalı futbolçuya fərdi mükafatı əldə etmək üçün komanda titulları çatışmayıb.
İdman.Biz xarici mediaya istinadən xəbər verir ki, Reqraqi Mbappenin səsvermədə Harri Keyndən cəmi 28 xal geri qalmasını mübarizənin nə qədər gərgin keçdiyinin göstəricisi adlandırıb.
"Düşünürəm ki, o, məyus olub. Bununla belə, səsvermədə xal fərqinin az olması göstərir ki, bu il son ana qədər kimin qalib gələcəyi məlum deyildi. Mübarizə olduqca gərgin keçib.
Harri Keynin mükafatı qazandığını görəndə Mbappe, bəlkə də, "Qızıl top"un Lamin Yamala verilməsi halında yaşayacağı məyusluqdan daha az məyus olub. Amma nəticədə Yamal qələbədən xeyli uzaq qaldı. Kilian bunun öz şansı olduğunu düşünmüş ola bilər", - deyə Reqraqi bildirib.
Sabiq baş məşqçinin fikrincə, bu nəticə Mbappeni "Real Madrid"dəki roluna və qarşısına qoyduğu hədəflərə yenidən baxmağa sövq etməlidir.
"Düşünürəm ki, Kilian indi bəzi məsələləri yenidən nəzərdən keçirəcək və komandasını titullara daşımalı olduğunu anlayacaq. Yəqin ki, müəyyən dəyişikliklər etməlidir. Çünki o, mükafatı qazanmağa çox yaxındır.
Əgər bu mövsüm hər hansı titul qazansa, gələn il böyük ehtimalla "Qızıl top"un sahibi olacaq", - deyə mütəxəssis əlavə edib.
Qeyd edək ki, 2026-cı il üzrə "Qızıl top" mükafatının qalibi "Bavariya"nın hücumçusu Harri Keyn olub. İngiltərəli futbolçu səsvermədə 1055 xal toplayıb. İkinci yeri tutan Mbappe isə 1027 xal qazanaraq qalibdən 28 xal geri qalıb.
