İdman.biz
"Sabah"ın baş məşqçisi postunu tərk edən Krunoslav Renduliç Bakı klubunu 29 oyuna çıxarıb.
İdman.biz xəbər verir ki, martın 5-də bu posta təyin olunan 51 yaşlı mütəxəssislə müqaviləyə 265 gündən sonra qarşılıqlı razılaşma ilə xitam verilib.
1,5 illik anlaşma imzalayan xorvatiyalı bu müddəti yarılamamış işsiz qalıb. Buna komandanın Misli Premyer Liqasındakı nəticələri səbəb olub. Keçirdiyi 14 matçın yarısında heç-heçə edən komanda 19 xalla 5-ci yerdədir.
Debütü martın 9-da "Qəbələ" ilə ev matçına təsadüf edən Renduliç işinə qələbə ilə başlayıb – 2:1. Vida isə "Turan Tovuz"la səfərdəki bərabərlikdən (1:1) sonra gerçəkləşib.
Bu müddətdə "Sabah" Premyer Liqada 25, Konfrans Liqasında 4 görüşə çıxıb. Paytaxt təmsilçisi Renduliçlə 13 qələbəyə sevinib, 7 heç-heçə edib və 9 dəfə uduzub. 7-ci sülh heç də xoşbəxt rəqəm olmayıb. Bu 29 matçda 47 qol vuran bakılılar 40-nı buraxıblar.
Qeyd edək ki, xorvatiyalı mütəxəssis baş məşqçi postunda rusiyalı Murad Musayevi əvəzləmişdi.
Vüqar Xeyrullayev
İdman.biz
