Sport24.az
"İlk oyunda qolsuz bərabərə qalmışdıq. Bu amilin özü də cavab matçının asan olmayacağını göstərirdi. Gözlədiyimiz kimi də alındı". Bu sözləri Sport24.az-a açıqlamasında "Sabah"ın futbolçusu Rəhman Daşdəmirov deyib.
25 yaşlı müdafiəçi "Sumqayıt"a səfərdə 4:0 hesabı ilə qalib gəldikləri Azərbaycan Kubokunun 1/4 final mərhələsinin cavab oyunu ilə bağlı fikirlərini bölüşüb:
"İlk hissədə rəqibin müdafiə xəttini yarmaqda çətinlik çəkirdik. Lakin fasilədən sonra komanda olaraq daha yaxşı oynadıq. İlk qoldan sonra oyunun axarı dəyişdi. Ardıcıl qollar vurub, lazım olan qələbəni qazandıq və yarımfinala adladıq. Mərhələ adladığımıza görə şadam. Bu raundu da keçib finala yüksəlmək istəyirik".
O, Premyer Liqanın XXV turunda "Araz-Naxçıvan"a qarşı keçirəcəkləri qarşılaşma haqqında da danışıb:
"Bu komanda cari mövsümdə yaxşı nəticələr qazanır. Turnir cədvəlində də ilk sıralarda yer alıblar. Çətin matç olacaq. Ümumiyyətlə, çempionatda asan oyun yoxdur. Bütün komandalar yaxşı nəticə üçün sona kimi mübarizə aparırlar. Çempionatda hər oyunumuz bizim üçün final əhəmiyyətindədir. Bu oyun da həmçinin. Əlimizdən gələni edəcəyik ki, meydandan 3 xalla ayrılaq".
