Sport24.az
"Matçda altı qol vuruldu. Məncə azarkeşlər maraqlı qarşılaşma izlədilər". Bu sözləri Sport24.az-a açıqlamasında "Sabah"ın futbolçusu Rəhman Daşdəmirov deyib.
O, Misli Premyer Liqasının 28-ci turunda səfərdə "Sumqayıt"la heç-heçə etdikləri (3:3) oyunla bağlı fikirlərini bölüşüb:
"Öz oyunumuza gəldikdə meydana üç xal üçün çıxmışdıq. İlk dəqiqələrdən də hesabı açmışdıq. Lakin hesabda geri düşdükdən sonra yenidən önə keçdik. Amma qapımızda qol gördük və qalibiyyət əldə edə bilmədik. İstənilən halda mübarizəmiz davam edir. Qarşıda bizi vacib görüşlər gözləyir. Bütün diqqətimizi onlara yönəldəcəyik".
Daşdəmirov komandasının mövsümü ilk "dördlük"də başa vurmaq istədiyini söyləyib:
"Hələ mövsüm davam edir. Çempionatda bizi daha 8 oyun gözləyir. Bu matçlardan sonra hər şey ola bilər. Nə qədər ki, şansımız var sonadək mübarizə aparacağıq. Mövsümün sonunda hədəflərimizə çatacağımıza ümid edirəm".
O, aprelin 2-də "Neftçi"yə qarşı keçirəcəkləri Azərbaycan Kubokunun yarımfinal mərhələsinin ilk oyunu ilə bağlı da danışıb:
"Qarşıdakı bizi önəmli matç gözləyir. Bu, rəqib üçün də vacib qarşılaşmadır. Düşünürəm ki, şanslar bərabərdir. Hər şeyə iki oyundan sonra aydınlıq gələcək. "Neftçi" ilə matçlarımız həmişə maraqlı keçir. Məncə bu dəfə də belə olacaq".
