Sport24.az
"Real" ulduz hücumçusu Vinisius Juniorsuz qala bilər. Sport24.az xəbər verir ki, braziliyalı futbolçunun ətrafında gərginlik artır. Klubda çoxları onun xarakterini bəyənmir.
İspaniya mətbuatı Vinisiusun "Leqanes"lə son kubok matçında (3-2) "Kral klubu"nun əfsanəsi Luka Modriç tərəfindən tənqid edildiyini iddia edir.
Braziliyalının müdafiəyə kömək etməməsi xorvatiyalının xoşuna gəlməyib. Klub rəhbərliyi ilə Vinisius arasında da gərginlik artır. Bütün bunlar braziliyalını Səudiyyə Ərəbistanından gələn rekord təklifə "hə" deməyə, yayda Madridi tərk etməyə getdikcə daha çox sövq edir.
Vinisius klubdan ayrılmaq qərarına gəlsə, "Real" onu satacaq.
Qeyd edək ki, hücumçu bu mövsüm madridlilərin heyətində 28 oyun keçirib, 16 qol vurub və 10 məhsuldar ötürmə edib. Daha əvvəl "Real"ın Vinisiusu 200 milyon avroya satmağa hazır olduğu bildirilirdi.
