Idman.biz
İspaniyanın "Real Madrid" komandasının hücumçusu Vinisius Juniorun gələcəyi ilə bağlı klubun mövqeyi formalaşıb.
İdman.Biz ABC nəşrinə istinadla xəbər verir ki, "Real Madrid" heç bir şərtlə Vinisiusun 2027-ci ildə müqaviləsi bitdikdən sonra klubu pulsuz tərk etməsinə icazə verməyəcək.
Klub prezidenti Florentino Peres Vinisiusun əsas tərəfdarlarından biridir və onu komandada Kilian Mbappedən sonra ikinci ən vacib oyunçu hesab edir. Lakin bu dəstək futbolçu ilə müqavilənin problemsiz və avtomatik uzadılacağı anlamına gəlmir.
Mənbənin yazdığına görə, Vinisiusun və onun agentlərinin maliyyə tələbləri klubun təklifindən ciddi şəkildə fərqlənir. "Real Madrid" onun maaşını Mbappenin qazandığı səviyyəyə yaxınlaşdırmağa qətiyyən hazır deyil.
Qeyd olunur ki, tərəflər arasında razılaşma əldə olunmasa, klub Vinisiusu müqaviləsinin bitməsindən əvvəl satmaq variantını da istisna etmir.
