Sport24.az
"Bu matç barəsində təəssüratlarım xoşdur. Qələbə qazanmaq həmişə sevindiricidir. Hazırkı durumda üç xala çox ehtiyacımız var idi. Hər matçda maksimum nəticə əldə etməyə çalışacağıq". Bu sözləri Sport24.az-a açıqlamasında "Kəpəz"in futbolçusu Rauf Hüseynli deyib.
29 yaşlı cinah oyunçusu evdə "Sabah"a 3:2 hesabı ilə qalib gəldikləri Azərbaycan Premyer Liqasının XXI turunun oyunu ilə bağlı fikirlərini bölüşüb:
"Bu görüşdəki nəticə təbii ki, bizə əlavə motivasiya verdi. Lakin hər qarşılaşmaya döyüşmək üçün çıxırıq. Maksimum çox xal toplamaq niyyətindəyik. Bunun üçün də əlimizdən gələni edirik".
64-cü dəqiqədə penaltidən fərqlənməklə qalibiyyət qoluna imza atan Hüseynli bunun sevindirici hal olduğunu söyləyib: "Mən də çox sevindim. Lakin əsas komandamın qələbə əldə etməsidir. Komanda oyunu göstərərək buna nail olduq".
O, "Kəpəz"dəki yerli futbolçuların səviyyəsi haqqında danışıb: "Hamı öz fikrində azaddır. Öz düşüncələri ola bilər. Normal qarşılayırıq. Məncə, kollektivdə yetəri qədər keyfiyyətli yerli futbolçular var".
Futbolçu son olaraq XXII turda "Araz-Naxçıvan"la matça toxunub: "Bu oyuna da ciddi və yüksək konsentrasiyası ilə hazırlaşacağıq. Əlimizdən gələni edəcəyik. Qarşımıza düşən şanslardan istifadə edib qələbə qazanmaq istəyirik".
