Idman.biz
"Ferentsvaroş" doğma azarkeşləri önündə məğlub olub. Bu üzdən itiriləcək nəsə qalmayıb. Ona görə də ilk dəqiqələrdən hücum futbolu sərgiləyərək, qalib gəlmək istəklərini göstərməyə çalışacaqlar. Çünki başqa yolları yoxdur. Bu isə "Qarabağ" üçün əks-hücumlarda rəqibi cəzalandırmaq baxımından şans yarada bilər".
İdman.biz xəbər verir ki, bu fikirləri Futbolinfo.az-a açıqlamasında "Qarabağ"ın keçmiş hücumçusu Rauf Əliyev səsləndirib.
Veteran futbolçu səfərdə qazanılan nəticənin "Qarabağ"da arxayınlıq yaratmayacağını deyib: "Səfərdə qazanılan qələbə psixoloji baxımdan oyunçular üçün çox önəmlidir. Amma "Qarabağ" futbolçuları kifayət qədər təcrübəlidirlər. Onların çoxu uzun illərdir avrokuboklarda çıxış edir. Fikrimcə, səfərdə əldə olunan nəticə komandada arxayınlıq yaratmayacaq. Əksinə, onlar yenə də tam ciddi yanaşaraq meydana çıxacaqlar. "Qarabağ" rəqibdən asılı olmayaraq, daim sabit futbol nümayiş etdirir. Hesabda öndə olsalar belə, müdafiəyə çəkilmirlər. Çünki bu, onlar üçün riskli ola bilər. Düşünürəm ki, yenə də topa nəzarət edəcək, hücuma daha çox diqqət yetirəcəklər".
Onun sözlərinə görə, komanda oyundan-oyuna daha yaxşı təsir bağışlayır, artıq istədikləri oyun ritmini tapıb: "Komanda oyundan-oyuna daha yaxşı təsir bağışlayır. Ola bilsin, artıq təlim-məşq toplanışından sonra istədikləri oyun ritmini tapırlar. Hər bir futbolçunun formaya düşmə prosesi fərqlidir. Səfərdə baş tutan matçda "Qarabağ"ı çox yaxşı gördük. Hesabda geri düşmələrinə baxmayaraq, topa nəzarət və fiziki üstünlük açıq şəkildə hiss olunurdu. Məncə, bu gün də eyni mənzərəni görəcəyik. Komandanın hazırkı səviyyəyə gəlib çıxmasında hər bir futbolçunun zəhməti var".
Sabiq futbolçu keçmişlə bu günü müqayisə edib: "Hazırkı heyətlə bizim dövr arasında böyük fərq var. O vaxt əsasən yerli futbolçulardan ibarət, avrokubok həyəcanını yeni yaşayan gənc komanda idik. Heyətin 80 faizi gənclərdən ibarət idi. Bu, bizim üçün çox dəyərli təcrübə oldu. Azarkeşlər də "Qarabağ"a inanmağa başlamışdı. Sonrakı illərdə klub xeyli təcrübə topladı və oyun sistemini formalaşdırdı. İndi isə güclü legionerlər heyətə qoşulub. Klub ildən-ilə böyüyür, inkişaf edir. Mən yalnız uğurlarının davamlı olmasını arzulayıram. İnşallah, Çempionlar Liqasının qrup mərhələsinə düşə bilərlər".
İdman.biz
