Report.az
PSJ-nin tarixində ilk dəfə UEFA Çempionlar Liqasını qazanması Usman Dembeleni "Qızıl top" yarışında əsas favoritlərdən birinə çevirmişdi.
Bunu "Report"a açıqlamasında "Qızıl top" mükafatının Azərbaycan üzrə təmsilçisi Rasim Mövsümzadə deyib.
O, Məhəmməd Salahın 4-cü olmasını "Liverpul"un avrokuboklardakı uğursuzluğu ilə əlaqələndirib:
"Liverpul" UEFA Çempionlar Liqasında mübarizəni dayandırana kimi Məhəmməd Salah "Qızıl top"u qazanmağa əsas namizəd sayılırdı. Amma İngiltərə klubunun Avropadakı uğursuzluğu misirli futbolçunun mükafat uğrunda mübarizədə dördüncü yeri tutması ilə nəticələndi. 2025-ci il başlayandan qollarını sıralayan və çıxış etdiyi PSJ-nin tarixində ilk dəfə Çempionlar Liqasını qazanması Usman Dembeleni "Qızıl top" yarışında əsas favoritlərdən biri etmişdi. Nəticədə fransalı Lamin Yamalla mübarizədən qalib ayrıldı. Düzdür, Dembele Çempionlar Liqasının bombardiri olmasa (8 qol vurub, ən məhsuldar oyunçulardan 5 qol geri qalıb) da, ümumilikdə ötən mövsüm ərzində bütün yarışlarda 35 dəfə fərqlənməsi seçimdə sözünü deyib. Onun əsas rəqibi, sorğuda ikinci olan Yamalın isə gələcəyi hələ qabaqdadır. Cəmi 18 yaşı var. "Qızıl top"un ən gənc qalibi 21 yaşında braziliyalı Ronaldo olub. Yamal qarşıdakı illərdə onun rekordunu yeniləyə bilər".
Qeyd edək ki, "France Football" nəşrinin ilin ən yaxşı futbolçusu üçün təsis etdiyi "Qızıl top" mükafatının qalibi PSJ-nin futbolçusu Usman Dembele olub.
Usman Dembele "Qızıl top" Məhəmməd Salah Lamin Yamal PSJ "Liverpul" klubu Rasim Mövsümzadə
